ശാസ്താംകോട്ട: നീതിപീഠങ്ങളുടെ നേതൃത്വത്തിലുള്ള ലീഗൽ സർവീസസ് കമ്മിറ്റികൾ നടത്തുന്ന അദാലത്തുകളും നിയമസഹായ ക്ലിനിക്കുകളും അധുനിക നീതി നിർവഹണ സംവിധാനത്തിന്റെ ഏറ്റവും പുരോഗമനാത്മകവും അർത്ഥപൂർണവുമായ മുഖമാണെന്ന് കൊല്ലം ജില്ലാ സെഷൻസ് ജഡ്ജ് എസ്.എച്ച്. പഞ്ചാപകേശൻ പറഞ്ഞു. കുന്നത്തൂർ താലൂക്ക് ലീഗൽ സർവീസസ് കമ്മിറ്റി താലൂക്കിലെ ഏഴ് പഞ്ചായത്തുകളിൽ നടപ്പാക്കുന്ന സൗജന്യ നിയമസഹായ സംവിധാനമായ ലീഗൽ ക്ലിനിക്കിന്റെ ബ്ലോക്ക് തല ഉദ്ഘാടനം നിർവഹിക്കുകയായിരുന്നു അദ്ദേഹം. തീരെ പണച്ചെലവില്ലാത്തതും പെട്ടെന്ന് ഫലം കിട്ടുന്നതുമായ ഈ നീതി നിർവഹണ രീതി ഒരു ശീലമാക്കാൻ ബഹുജനങ്ങൾ മുന്നോട്ട് വരണം. നീതി നിയമാനുസൃതം നടപ്പാക്കിക്കിട്ടാനുള്ള കാലതാമസമാണ് നമ്മുടെ സമൂഹം നേരിടുന്ന ഏറ്റവും വലിയ വെല്ലുവിളി. ഈ അവസ്ഥയ്ക്കുള്ള പരിഹാരമാണ് അദാലത്തുകളും ലീഗൽ ക്ലിനിക്കും. ലളിതമായ നടപടി ക്രമങ്ങളോടെ നടപ്പാക്കുന്ന ഈ നൂതന നീതിനിർവഹണ രീതി രാജ്യത്ത് അതിവേഗം വേരോടുകയാണെന്നും അദ്ദേഹം വ്യക്തമാക്കി. ശാസ്താംകോട്ട ബ്ലോക്ക് പഞ്ചായത്ത് പ്രസിഡന്റ് ബി. അരുണാമണി അദ്ധ്യക്ഷത വഹിച്ചു. കുന്നത്തൂർ താലൂക്ക് ലീഗൽ സർവീസസ് കമ്മിറ്റി ചെയർമാനും മുൻസിഫ് മജിസ്ട്രേറ്റുമായ ടി.വി. ബിജു, ശാസ്താംകോട്ട ജുഡിഷ്യൽ ഒന്നാം ക്ലാസ് മജിസ്ട്രേറ്റ് എസ്. ഹാഷിം, ബാർ അസോസിയേഷൻ പ്രസിഡന്റ് വി.കെ. പ്രസാദ്, സെക്രട്ടറി സിബു എം.എ വട്ടവിളയിൽ എന്നിവർ സംസാരിച്ചു.