കൊല്ലം: സംസ്ഥാനത്ത് വിവിധ ജില്ലകളിൽ ഉണ്ടായ മഴക്കെടുതിയെ തുടർന്ന് ക്യാമ്പുകളിലേക്ക് മാറിയ ആയിരങ്ങളെ സഹായിക്കുന്നതിന് കൊല്ലത്ത് ദുരിതാശ്വാസ വസ്തുക്കൾക്കായി ശേഖരണ കേന്ദ്രങ്ങൾ തുറന്നു. ജില്ലാ ഭരണകൂടത്തിന്റെ നേതൃത്വത്തിൽ കളക്‌​ടറേറ്റിന് സമീപമുള്ള ടി. എം വർഗീസ് ഹാളിലും താലൂക്ക് ഓഫീസുകളിലുമാണ് ശേഖരണ കേന്ദ്രങ്ങൾ ആരംഭിച്ചത്. മരുന്നുകൾ, പുതപ്പുകൾ, പുതുവസ്ത്രങ്ങൾ, കുട്ടികളുടെ വസ്ത്രങ്ങൾ, ചെരുപ്പുകൾ, കുപ്പിവെള്ളം, അരി, പെട്ടെന്ന് കേടുവരാത്ത ഭക്ഷണ സാധനങ്ങൾ, ബാറ്ററി ടോർച്ചുകൾ, കൊതുകുതിരികൾ, സോപ്പുകൾ, ഡെറ്റോൾ, നാപ്കിനുകൾ തുടങ്ങിയ നിരവധി ഉത്പന്നങ്ങളാണ് ആദ്യദിനത്തിൽ ലഭിച്ചത്. 40 ഓളം ജീവനക്കാരാണ് ടി എം വർഗീസ് ഹാളിലെ സേവന കേന്ദ്രത്തിൽ മാത്രം പ്രവർത്തിക്കുന്നത്. 170 വാളന്റിയർമാരും സേവന സന്നദ്ധരായി സജീവമായി കേന്ദ്രത്തിലുണ്ട്. അസിസ്റ്റന്റ് കളക്ടർ മാമോനി ഡോലെക്കാണ് ഏകോപന ചുമതല.
ജനങ്ങളുടെ മികച്ച പ്രതികരണമാണ് ശേഖരണ കേന്ദ്രങ്ങളിൽ അനുഭവപ്പെടുന്നതെന്ന് ജില്ലാ കളക് ടർ ബി അബ്ദുൽ നാസർ അറിയിച്ചു. കൊല്ലം കോർപ്പറേഷനിലും ശേഖരണ കേന്ദ്രം തുറന്നതായി മേയർ അഡ്വ വി രാജേന്ദ്ര ബാബു പറഞ്ഞു. കൊല്ലം എ ആർ ക്യാമ്പിൽ ദുരിതാശ്വാസ വസ്തുക്കൾ സ്വീകരിക്കുന്നതിന് പ്രത്യേക കൗണ്ടർ ആരംഭിച്ചതായി സിറ്റി പൊലീസ് കമ്മിഷണർ മെറിൻ ജോസഫ് വ്യക്തമാക്കി.