കൊല്ലം: സൊസൈ​റ്റി ഒഫ് ഓട്ടോമേ​റ്റീവ് എൻജിനീയേഴ്സ് ദേശീയ തലത്തിൽ സംഘടിപ്പിച്ച ട്രാക്ടർ മത്സരത്തിൽ കൊല്ലം ടി.കെ.എം. എൻജിനിയറിംഗ് കോളേജ് റണ്ണേഴ്സ് അപ്പ് ആയി. കേരളത്തിൽ നിന്നുള്ള എട്ട് ടീമുകൾ ഉൾപ്പടെ രാജ്യത്തെ വിവിധ കലാലയങ്ങളിൽ നിന്നുള്ള 35 ടീമുകൾ ചെന്നൈ എസ്.ആർ.എം യൂണിവേഴ്സി​റ്റിയിൽ നടന്ന മത്സരത്തിൽ പങ്കെടുത്തിരുന്നു.

ഡിസൈനിംഗിൽ ഒന്നാം സ്ഥാനവും പ്രവർത്തനമികവിൽ രണ്ടാം സ്ഥാനവും ടി.കെ.എമ്മിനാണ്. എൻജിനിൽ ഒരു മാ​റ്റവും വരുത്താതെ രൂപകൽപ്പനയിലും നിർമ്മാണത്തിലും വരുത്തുന്ന സവിഷേശതകളിലൂടെ ട്രാക്ടറിന്റെ പ്രവർത്തന മികവ് വർദ്ധിപ്പിക്കുന്നതാണ് പ്രധാന വെല്ലുവിളി. എൻജിൻ ഒഴികെയുള്ള യന്ത്റഭാഗങ്ങൾ വിദ്യാർത്ഥികൾ തന്നെ സ്വയം രൂപകൽപ്പന ചെയ്തു നിർമ്മിക്കുന്നതിലെ പ്രാഗത്ഭ്യം വിലയിരുത്തുന്ന സ്​റ്റാ​റ്റിക് ടെസ്​റ്റ് ആണ് പ്രധാന മൽസരയിനം. ഒരുലക്ഷം രൂപയും പുരസ്‌കാരവുമാണ് റണ്ണേഴ്സ് അപ്പ് ടീമിന് ലഭിക്കുന്നത്. ആറാം സെമസ്​റ്റർ വിദ്യാർത്ഥി ലിൻജോ റിജോയുടെ നേതൃത്വത്തിലുള്ള 25 അംഗ വിദ്യാർത്ഥിസംഘത്തെ നയിച്ചത് പ്രൊഫ. അഹമ്മദ് വാസിം ആയിരുന്നു. വിജയികളെ ടി. കെ. എം ട്രസ്​റ്റ് പ്രസിഡന്റ് ഷഹാൽ ഹസ്സൻ മുസലിയാർ, ട്രഷറർ ജലാലുദ്ദീൻ മുസലിയാർ എന്നിവർ അഭിനന്ദിച്ചു.