ഓയൂർ: മൈലോട് സ്‌കൂളിന് സമീപം റബ്ബർ ഷീ​റ്റ് പുകപ്പുരയും ഇതിനോട് ചേർന്നുള്ള വീടിന്റെ അടുക്കളയും ഭാഗീകമായി കത്തിനശിച്ചു. മൈലോട് മമതയിൽ റിട്ട. അദ്ധ്യാപകൻ തങ്കപ്പന്റെ പുകപ്പുരയും അടുക്കളയുമാണ് കത്തിയത്. ബുധനാഴ്ച വൈകിട്ട് മൂന്ന് മണിയോടെയായിരുന്ന സംഭവം. എഴുനൂറോളം റബർ ഷീ​റ്റുകളും അമ്പത് കിലോയോളം ഒട്ടുപാലും കത്തിനശിച്ചു. ഇവിടെ നിന്ന് തീപടർന്ന് വീടിന്റെ ഭിത്തിക്കും ചിമ്മിനിക്കും കേടുപാടുകൾ സംഭവിച്ചു. 40,000ത്തോളം രൂപയുടെ നഷ്ടം സംഭവിച്ചതായി വീട്ടുടമ പറഞ്ഞു. കൊട്ടാരക്കരയിൽ നിന്ന് ഫയർഫോഴ്‌സും പൂയപ്പള്ളി പൊലീസും സ്ഥലത്തെത്തി തീ നിയന്ത്രണ വിധേയമാക്കി.