വിഴിഞ്ഞം: വെങ്ങാനൂരിലെ ആളില്ലാത്ത വീട്ടിൽ നിന്നു 20 പവനും ഒന്നര ലക്ഷം രൂപയും മോഷ്ടിച്ച കേസിൽ പ്രതികളെക്കുറിച്ച് സൂചന ലഭിച്ചതായി വിഴിഞ്ഞം പൊലീസ് പറഞ്ഞു. വെങ്ങാനൂർ ഋഷികേശിൽ ശശിധരൻനായരുടെ വീട്ടിലാണ് മോഷണം നടന്നത്. പ്രതികളുടേതെന്ന് സംശയിക്കുന്ന സി.സി ടിവി ദൃശ്യം ലഭിച്ചതായി പൊലീസ് പറഞ്ഞു. വിരലടയാള വിദഗ്ദ്ധരും ഡോഗ് സ്‌ക്വാഡും ഇന്നലെ വീട്ടിലെത്തി തെളിവെടുത്തു. സമീപത്തെ ചില വീടുകളിൽ ഏതാനും ദിവസം മുമ്പ് മോഷണശ്രമം നടന്നിരുന്നു. വലിയതുറ മുതൽ വിഴിഞ്ഞം വരെയുള്ള മേഖലകളിൽ അടുത്തിടെയുണ്ടായ മോഷണങ്ങൾക്ക് പിന്നിൽ ഈ സംഘമാണെന്ന് സംശയിക്കുന്നതായി പൊലീസ് പറഞ്ഞു.