മുടപുരം: ലക്ഷങ്ങൾ വായ്പയെടുത്ത് വാഴക്കൃഷിചെയ്യുന്ന കർഷകർ വാഴക്കുല മോഷണം കാരണം കടക്കെണിയിൽ.

മുടപുരം ,മുട്ടപ്പലം പ്രദേശങ്ങളിൽ വാഴകൃഷിചെയ്യുന്ന കർഷകരാണ് ഈ ഭയപ്പാടിൽ കഴിയുന്നത്. കഴിഞ്ഞ മൂന്ന് മാസക്കാലത്തിനകം തന്നെ അഞ്ഞൂറ് വാഴക്കുലകൾ എങ്കിലും തോട്ടത്തിൽ നിന്ന് വെട്ടിക്കടത്തി. മുടപുരം,മുട്ടപ്പലം,മരങ്ങാട്ടുകോണം,ചിറ്റാരിക്കോണം തുടങ്ങി 15 ഹെക്ടർ പ്രദേശത്ത് അൻപതിനായിരത്തില്പരം വാഴകൾ മുപ്പതോളം കർഷകർ അനേകവർഷങ്ങളായി കൃഷിചെയ്യുന്നുണ്ട്.

ഏത്തൻ,കപ്പ,പാളയംകോടൻ, ഞാലിപ്പൂവൻ, റോബസ്റ്റ തുടങ്ങി വിവിധ ഇനത്തിലുള്ള വാഴകൾ ഇവിടെ കൃഷി ചെയ്യുന്നുണ്ട്.ധനകാര്യ സ്ഥാപനങ്ങളിൽ നിന്നും വ്യക്തികളിൽ നിന്നും വായ്പയെടുത്തും കടം വാങ്ങിയും ആണ് ഇവർ കൃഷി ചെയ്യുന്നത്.മോഷ്ടാക്കളുടെ അതിക്രമം മൂലം ഒരുദിവസം കുറഞ്ഞത് 2000 രൂപയുടെ നഷ്ടമെങ്കിലും സംഭവിക്കാറുണ്ട്.രാത്രി ആയാലും പകലായാലും ആളൊഴിഞ്ഞ സ്ഥലത്ത് ഇരുചക്ര വാഹനത്തിൽ ചാക്കുമായി വന്നാണ് മോഷ്ടാക്കൾ വാഴയിൽ നിന്നും കുലവെട്ടി ചാക്കിലാക്കും.

ഇവരെ പിടികൂടാൻ കർഷകർ രാത്രിയും പകലും കവലിരുന്നാലും മോഷ്ടാക്കൾ ആളൊഴിഞ്ഞ സ്ഥലത്തു പോയി കുലവെട്ടി കടത്തുകയാണ്‌ പതിവ്. ഇത് സംബന്ധിച്ച് ചിറയിൻകീഴ് പൊലീസിൽ മരങ്ങാട്ടുകോണം വാഴ കർഷക സമിതി പരാതി നൽകി. പൊലീസ് ഇത് സംബന്ധിച്ച് അന്വേഷിച്ചെങ്കിലും മോഷ്ടാക്കളെ പിടികൂടുവാൻ ആയില്ല.

ഒരുദിവസം മോഷ്ടിക്കുന്നത് 5 കുലകൾ

വാഴക്കുല മോക്ഷണം വായ്പയെടുത്തും കടമെടുത്തും കൃഷിചെയ്യുന്ന വാഴകർഷകരെ സാമ്പത്തികമായി തകർക്കുന്നു.അതിനാൽ ഈ മോഷ്ടാക്കളെ പിടികൂടുവാൻ പൊലീസ് അടിയന്തര നടപടി സ്വീകരിക്കണം.
ഗോപാലകൃഷ്ണൻ(പ്രസിഡന്റ്),വിനോദ്‌കുമാർ(സെക്രട്ടറി),മരങ്ങാട്ടുകോണം വാഴ കർഷക സമിതി.