മലയിൻകീഴ്: മലയിൻകീഴ് ഗവ. ഹയർസെക്കൻഡറി സ്‌കൂൾ കളിസ്ഥലവുമായി ബന്ധപ്പെട്ട് മാധവകവി സ്മാരക കോളേജുമായുള്ള തർക്കം പരിഹരിച്ചു. ഡെപ്യൂട്ടി കളക്ടർ ജോൺസാമുവലിന്റെ നേതൃത്വത്തിൽ ജില്ല സർവേ സൂപ്രണ്ടുൾപ്പടെ സ്ഥലം സന്ദർശിച്ച് സ്‌കൂളും കോളേജും തമ്മിലുള്ള അതിരുതിരിച്ച് കല്ലിട്ടു. സ്‌കൂൾ പ്രിൻസിപ്പൽ ഡോ. ഐ.ആർ.ജീജ, ഹെഡ്മാസ്റ്റർ ദേവപ്രദീപ്, കോളേജ് പ്രിൻസിപ്പൽ ഡോ. എസ്.പി.ചാന്ദ്‌നിസാം എന്നിവർ പങ്കെടുത്തു. സ്‌കൂൾ കളിസ്ഥലം ഉൾപ്പെടുന്നിടത്ത് ഗവ. കോളേജിന്റെ രണ്ടാംഘട്ട വികസന പ്രവർത്തനങ്ങൾ നടത്തുന്നത് കളിസ്ഥലം നഷ്ടപ്പെടാൻ കാരണമാകുമെന്നതിനാലാണ് നേരത്തെ സ്കൂൾ അധികൃതർ തർക്കമുന്നയിച്ചത്. കോളേജിന് മലയിൻകീഴ് വൊക്കേഷണൽ ഹയർസെക്കൻഡറി സ്കൂളിന്റെ 3.90 ഏക്കറും ഗേൾസ് ഹയർസെക്കൻഡറി സ്കൂളിന്റെ 1.10 ഏക്കറുമുൾപ്പെടെ 5 ഏക്കർ സ്ഥലം രേഖാമൂലം വിട്ട് നൽകിയിരുന്നെങ്കിലും അതിരു തിരിച്ച് കല്ലിട്ടിരുന്നില്ല. കോളേജ് വികസന പ്രവർത്തനങ്ങൾ പുരോഗമിക്കുമ്പോഴാണ് സ്‌കൂളിന്റെ കളിസ്ഥലം കോളേജിൽ ഉൾപ്പെട്ടെന്ന് അറിയുന്നത്. മികവിന്റെ കേന്ദ്രമാക്കുന്നതിന്റെ ഭാഗമായി ഗവ. ഗേൾസ് സ്കൂളിൽ 8 കോടി രൂപയുടെ മന്ദിരനിർമ്മാണം പുരോഗമിക്കുകയാണ്. കോളേജിന് സ്ഥലം വിട്ടു നൽകുമ്പോൾ സ്‌കൂളിന് വേറെ കളിസ്ഥലം കണ്ടെത്തേണ്ടതുണ്ട്.