തിരുവനന്തപുരം: കനത്ത മഴയെത്തുടർന്ന് വിവിധ റൂട്ടുകളിൽ പാസഞ്ചർ, എക്സ്പ്രസ് ട്രെയിനുകൾ റദ്ദാക്കി. നാളെയും,​ പന്ത്രണ്ടിനും കൊല്ലത്തു നിന്ന് കോട്ടയം വഴി എറണാകുളത്തേക്കും,​ എറണാകുളത്തു നിന്ന് ആലപ്പുഴ വഴി കൊല്ലത്തേക്കുമുള്ള മെമു പാസഞ്ചർ ട്രെയിനുകൾ റദ്ദാക്കി. നാളെയും തിങ്കളാഴ്ചയും സർവീസ് നടത്തേണ്ട എറണാകുളം- കൊല്ലം പാസഞ്ചറും,​ 11 നും 13 നുമുള്ള കൊല്ലം- കോട്ടയം പാസഞ്ചറും കായംകുളം വരെയേ ഉണ്ടാകൂ.

നാളെയും തിങ്കളാഴ്ചയുമുള്ള പാലക്കാട്- തിരുനെൽവേലി പാലരുവി എക്സ്പ്രസ് കരുനാഗപ്പള്ളിയിൽ യാത്ര അവസാനിപ്പിക്കും. പകരം കരുനാഗപ്പള്ളിയിൽ നിന്ന് തിരുനെൽവേലിയിലേക്ക് പാസഞ്ചർ സ്‌പെഷ്യൽ ട്രെയിൻ സർവീസ് നടത്തും. കരുനാഗപ്പള്ളിയിൽ നിന്ന് പുലർച്ചെ 1.45ന് പുറപ്പെടുന്ന ഈ ട്രെയിനിന് പാലരുവി എക്സപ്രസിന്റെ സ്റ്റോപ്പുകളുണ്ടാകും.

മഹാരാഷ്‌ട്രയിലെ പേമാരി കാരണം ഇന്നും നാളെയുമുള്ള മുംബയ്- കന്യാകുമാരി ജയന്തി ജനത എക്സ്‌പ്രസ് ട്രെയിൻ മുംബയ്‌ക്കും സോളാപൂരിനുമിടയിൽ ഭാഗികമായി റദ്ദാക്കി. ഇന്നും നാളെയുമുള്ള കന്യാകുമാരി- മുംബയ് ജയന്തി ജനത എക്സപ്രസ് സോളാപൂർ വരെയേ സർവീസ് നടത്തൂ.
.