തിരുവനന്തപുരം: പി.എസ്.സി കോൺസ്​റ്റബിൾ പരീക്ഷാ തട്ടിപ്പു കേസിലെ പ്രതികളുടെ വീട്ടിൽ ക്രൈംബ്രാഞ്ച് സംഘം റെയ്ഡ് നടത്തി. ഡിവൈ.എസ്.പി ഹരികൃഷ്ണന്റെ നേതൃത്വത്തിലുള്ള സംഘമാണ് റെയ്ഡ് നടത്തിയത്. ഉത്തരങ്ങൾ എസ്.എം.എസായി സ്വീകരിച്ച ഫോണുകൾ കണ്ടെത്താനായിരുന്നു പരിശോധന.

ക്രൈംബ്രാഞ്ച് രജിസ്​റ്റർ ചെയ്ത കേസിൽ അഞ്ചു പ്രതികളാണുള്ളത്. ഇതിൽ കല്ലറ വട്ടക്കരിക്കകം സ്വദേശി സഫീർ, അയൽവാസിയും എ.ആർ ക്യാമ്പിലെ സിവിൽ പൊലീസ് ഓഫിസറുമായ വി.എം. ഗോകുൽ, സഫീറിന്റെ സുഹൃത്തും യൂണിവേഴ്‌സി​റ്റി കോളജിലെ കുത്തുകേസ് പ്രതിയുമായ പ്രണവ് എന്നിവരുടെ വീടുകളിലായിരുന്നു തിരച്ചിൽ. ഇവർ ഒളിവിലാണെന്ന് അന്വേഷണസംഘം പറഞ്ഞു.

മ​റ്റു പ്രതികളും യൂണിവേഴ്‌സി​റ്റി കോളേജിലെ എസ്.എഫ്‌.ഐ നേതാക്കളുമായ ശിവരഞ്ജിത്ത്, നസീം എന്നിവർ റിമാൻഡിലാണ്. പരീക്ഷാസമയത്ത് എസ്.എം.എസ് അയയ്ക്കാൻ ഉപയോഗിച്ച അഞ്ച് ഫോണുകളിലൊന്ന് പ്രണവിന്റെ ബന്ധുവിന്റേതാണ്. ഇവരിൽ നിന്ന് ക്രൈംബ്രാഞ്ച് മൊഴിയെടുത്തു. കുത്തുകേസിൽ പതിനേഴാം പ്രതിയായ പ്രണവ് ജൂലായ് 27 മുതൽ ഒളിവിലാണ്. ഈ കേസ് അന്വേഷിക്കുന്ന കന്റോൺമെന്റ് പൊലീസിനും ഇയാളെ കണ്ടെത്താനായിട്ടില്ല. പ്രതികളുടെ ഉത്തരക്കടലാസ് (ഒ.എം.ആർ ഷീ​റ്റ്), ഹാൾടിക്ക​റ്റ്, നസീമിന്റെ വ്യാജ ഐ.ഡി പ്രൊഫൈൽ വിശദാംശങ്ങൾ, സാക്ഷിമൊഴികൾ, പ്രതികളുടെ ഫോൺ വിശദാംശങ്ങളടങ്ങിയ സീഡി, മുൻകാല പി.എസ്.സി പരീക്ഷകളിൽ പ്രതികളുടെ മാർക്ക് തുടങ്ങിയ വിവരങ്ങൾ പി.എസ്.സി ക്രൈംബ്രാഞ്ചിന് കൈമാറി.