തിരുവനന്തപുരം: എക്‌സൈസ് സ്‌പെഷ്യൽ സ്‌ക്വാഡും തിരുവനന്തപുരം എക്‌സൈസ് ഐ.ബി ടീമും നടത്തിയ സംയുക്ത പരിശോധനയിൽ കോവളത്ത് നിന്നും 10 കിലോ കഞ്ചാവുമായി ഒരാൾ പിടിയിലായി. നിരവധി കഞ്ചാവ് കേസുകളിൽ പ്രതിയായ തെക്കുപാറ സത്യനാണ് തമിഴ്നാട്ടിൽ നിന്നും മോട്ടോർ സൈക്കിളിൽ കഞ്ചാവുമായി വരുമ്പോൾ അറസ്റ്റിലായത്. കിലോയ്‌ക്ക് 2500 രൂപ നിരക്കിൽ ആന്ധ്രാപ്രദേശിലെ ഈസ്റ്റ് ഗോദാവരി ജില്ലയിലെ തുണി എന്ന പട്ടണത്തിൽ നിന്നും തമിഴ്നാട്ടിലെ മാർത്താണ്ഡത്ത് സംഭരിച്ച് വച്ച ശേഷം കേരളത്തിൽ എത്തിക്കുകയാണ് ഇയാളുടെ പതിവ്. 10 കിലോ കഞ്ചാവ് കേരളത്തിൽ ചില്ലറ വില്പന നടത്തുമ്പോൾ ഇയാൾക്ക് 10 ലക്ഷം രൂപ ലഭിക്കുമെന്ന് എക്‌സൈസ് അധികൃതർ അറിയിച്ചു. സ്‌ക്വാഡ് സി.ഐ വിനോദ് കുമാറിന്റെ നേതൃത്വത്തിൽ ഇൻസ്‌പെക്ടർ സി.പി. പ്രവീൺ, പ്രിവന്റീവ് ഓഫീസർമാരായ സജിത്, മോൻസി, അനിൽ കുമാർ, സി.ഇ.ഒ പ്രകാശ്, ബിനു, ജിതീഷ്, ഡബ്ല്യു.സി.ഇ.ഒ അഞ്ജന, ഐബി ഇൻസ്‌പെക്ടർ മോഹൻ കുമാർ, പ്രിവന്റീവ് ഓഫീസർമാരായ സജി, ഷാജു, സുധീഷ് കൃഷ്ണ, ഷാജി, ഡ്രൈവർ അഭിലാഷ് എന്നിവർ ചേർന്നാണ് പ്രതിയെ പിടികൂടിയത്.