ചേർത്തല : തണ്ണീർമുക്കം ബണ്ടിൽ നിന്ന് വേമ്പനാട്ട് കായലിൽ വീണയാളെ രക്ഷിച്ച ഓട്ടോ ഡ്രൈവറെ തണ്ണീർമുക്കം വികസന സമിതിയുടെ നേതൃത്വത്തിൽ ആദരിച്ചു.തണ്ണീർമുക്കം പഞ്ചായത്ത് ആറാം വാർഡ് പള്ളിപ്പറമ്പിൽ ഭാസ്ക്കരന്റെ മകൻ ത്യാഗരാജ്(കുഞ്ഞുമോൻ-27)നെയാണ് വികസന സമിതി ആദരിച്ചത്.ഞായറാഴ്ച വൈകിട്ട് കായലിൽ വീണ് മരണത്തോട് മല്ലടിച്ച് കോൺക്രീറ്റ് തൂണിൽ പിടിച്ചുകിടന്ന മുഹമ്മ കായിപ്പുറം മാളിക വെളി അനിലിനെ(43) അതിസാഹസികമായി ത്യാഗരാജ് രക്ഷപ്പെടുത്തിയിരുന്നു.പാലത്തിന് സമീപത്തായി ഒരു ജോടി ചെരുപ്പുകൾ കിടക്കുന്നത് കണ്ട് സംശയം തോന്നി നടത്തിയ പരിശോധനയിലാണ് ഷട്ടറിന് താഴെ തൂണിൽ പിടിച്ചു കിടന്ന അനിലിനെ കാണുന്നത്.ഉടൻ തന്നെ ഷട്ടറിലൂടെ താഴെയ്ക്ക് ഇറങ്ങി റോപ്പ് ഉപയോഗിച്ച് അനിലിനെ ഉയർത്തി തൂണിന്റെ തിട്ടയിൽ നിർത്തി സ്പീഡ് ബോട്ടിൽ മാർക്കറ്റ് ജെട്ടിയിൽ എത്തിക്കുകയായിരുന്നു. തണ്ണീർമുക്കം വികസന സമിതിചെയർമാൻ കെ.ബാബുവാണ് ത്യാഗരാജിനെ ആദരിച്ചത്.സമിതി ഭാരവാഹികളായ തണ്ണീർമുക്കം ശിവശങ്കരൻ,ജി.ഗോപി,ബേബി തോമസ്,ടി.എം.ശ്രീധരൻ,ആട്ടോ ഡ്രൈവർമാർ എന്നിവർ പങ്കെടുത്തു.തണ്ണീർമുക്കം ഗ്രാമ പഞ്ചായത്തിന്റെ നേതൃത്വത്തിലും ത്യാഗരാജിനെ ആദരിക്കുമെന്ന് പ്രസിഡന്റ് അഡ്വ.പി.എസ്.ജ്യോതിസ് അറിയിച്ചു.