ന്യൂഡൽഹി: ഐ.എൻ.എക്സ് കേസിൽ കൂടുതൽ അറസ്റ്റ് ഇനി ആഗ്രഹിക്കുന്നില്ലെന്ന് തിഹാർ ജയിലിൽ കഴിയുന്ന മുൻ കേന്ദ്രമന്ത്രി പി. ചിദംബരത്തിന്റെ ട്വീറ്റ്. തനിക്ക് വേണ്ടി കുടുംബമാണ് ട്വീറ്റ് ചെയ്യുന്നത് എന്ന മുഖവുരയോടെയാണ് ട്വീറ്റ് ആരംഭിക്കുന്നത്. കേസുമായി ബന്ധപ്പെട്ട് ഒരു ഡസനോളം ഉദ്യോഗസ്ഥരുണ്ടെങ്കിലും ആരും അറസ്റ്റിലായിട്ടില്ല. എന്തുകൊണ്ടാണ് നിങ്ങൾ മാത്രം അറസ്റ്റിലായത്. അവസാന ഒപ്പ് ഇട്ടത് നിങ്ങളാണ് എന്നതുകൊണ്ടാണോ അറസ്റ്റ് ചെയ്തത്?’’ എന്ന് ആളുകൾ ചോദിക്കുന്നു. എനിക്ക് അതിന് ഉത്തരമില്ല.’’ ഇങ്ങനെയാണ് ചിദംബരത്തിന്റെ ട്വിറ്റർ അക്കൗണ്ടിലെ ഒരു കുറിപ്പ്.

‘‘ഒരു ഉദ്യോഗസ്ഥനും തെറ്റൊന്നും ചെയ്തിട്ടില്ല. ആരും അറസ്റ്റിലാകണമെന്ന് ഞാൻ ആഗ്രഹിക്കുന്നില്ല’’ എന്ന് മറ്റൊരു ട്വീറ്റും പിന്നാലെ വന്നു.

ഐ.എൻ.എക്സ് മീഡിയ അഴിമതി കേസിൽ സി.ബി.ഐ അറസ്റ്റ് ചെയ്‌ത ചിദംബരത്തെ രണ്ടാഴ്ചത്തെ ജുഡിഷ്യൽ കസ്റ്റഡിയിൽ കഴിഞ്ഞ വ്യാഴാഴ്ചയാണ് തിഹാർ ജയിലിലേക്ക് മാറ്റിയത്.