ന്യൂഡൽഹി: രാജ്യത്തിന്റെ ഭരണസിരാകേന്ദ്രമായ പാർലമെന്റിന് പുതിയ മുഖം നൽകാനൊരുങ്ങി കേന്ദ്ര സർക്കാർ. കേന്ദ്ര ഹൗസിംഗ് ആൻഡ് അർബൻ അഫയേഴ്‌സ് മന്ത്രാലയമാണ് ഈ ആശയം മുന്നോട്ട് വച്ചത്. രാജ്യം 75ാമത് സ്വാതന്ത്രദിനം ആഘോഷിക്കുന്ന 2022 ആഗസ്റ്റ് 15ന് പുതിയ പാർലമെന്റ് കെട്ടിടത്തിന്റെ ഉദ്ഘാടനവും നടത്താനാണ് കേന്ദ്രത്തിന്റെ തീരുമാനം. നിലവിലെ കെട്ടിടം പൂർണമായും പൊളിച്ച് പണിയുകയോ അല്ലെങ്കിൽ പഴയ ചരിത്രമുറങ്ങുന്ന കെട്ടിടം പുതുക്കി പണിയുകയോ ആവും ചെയ്യുക.1912-1913 കാലയളവിൽ ബ്രിട്ടീഷ് വാസ്തുശില്പികളായിരുന്ന എഡ്വിൻ ല്യുട്ടിൻസും ഹെർബെർട്ട് ബേക്കറും ചേർന്നാണ് ഇപ്പോഴത്തെ മന്ദിരത്തിന്റെ രൂപകല്പന നിർവഹിച്ചത്. 1921ൽ നിർമ്മാണം ആരംഭിച്ച് 1927ൽ പൂർത്തിയാക്കി. ഈ കെട്ടിടത്തിന്റെ ഉദ്ഘാടനം 1927 ജനുവരി 18ന് അന്നത്തെ വൈസ്രോയ് ആയിരുന്ന ഇർവിൻ പ്രഭു ആണ് നിർവഹിച്ചത്.