കിഴക്കമ്പലം: സീറ്റിലിരുന്ന് യാത്ര ചെയ്തതിനെ ചൊല്ലി എൻജിനീയറിംഗ് കോളേജ് വിദ്യാർത്ഥിനിയെ അപമാനിച്ച കേസിൽ അറസ്റ്റി​ലായി​ ജാമ്യത്തിലി​റങ്ങിയ ബസ് ഡ്രൈവർവീണ്ടും അതേ വിദ്യാർത്ഥിനിയ്ക്കു നേരെ അതേ ബസി​ൽ ആക്രോശം നടത്തുന്ന വോയ്സ് ക്ളിപ്പുകൾ വൈറലായി​.

'പത്രം വായിച്ചപ്പോഴാണ് തന്നെ അറസ്​റ്റു ചെയ്തതായി അറിയുന്നത്. പൊലീസല്ല ആരു വിചാരിച്ചാലും ഒന്നും ചെയ്യാൻ കഴിയില്ല. തനിയ്ക്ക് സബ് ജയിലിൽ പഴങ്ങളുമായി വരുന്നവരെ കാത്തിരിക്കുകയായിരുന്നു'.ഇങ്ങനെ പോകുന്നു ഡ്രൈവറുടെ പരി​ഹാസം.വോയ്സ് ക്ളിപ്പിനൊപ്പം ഇയാൾയൂണിഫോം ഇല്ലാതെ മൊബൈൽ ഫോണിൽ സംസാരിച്ച് ബസോട‌ിക്കുന്ന വീഡിയോയും പ്രചരിക്കുന്നുണ്ട്.

വി​ദ്യാർത്ഥി​നി​യെ അപമാനി​ച്ചതി​ന് മുവാ​റ്റുപുഴ- ആലുവ റൂട്ടിൽ സർവീസ് നടത്തുന്ന സ്വകാര്യ ബസി​ന്റെ ഡ്രൈവർ പട്ടിമ​റ്റം ചക്കരക്കാട്ടിൽ സുധീറി​നെ കഴിഞ്ഞ ദിവസം കുന്നത്തുനാട് പൊലീസ് അറസ്റ്റ് ചെയ്ത് സ്റ്റേഷൻ ജാമ്യം നൽകി​ വിട്ടിരുന്നു.എന്നാൽ ഇന്നലെപ്രചരി​ച്ച വോയ്സ് ക്ളി​പ്പിംഗുമായി​ ബന്ധപ്പെട്ട് പരാതി​ ലഭി​ച്ചി​ട്ടി​ല്ലെന്ന് കുന്നത്തുനാട് സി.ഐ വി.ടി ഷാജൻ പറഞ്ഞു. നേരത്തെ ബസ് ഡ്രൈവർ പെൺകുട്ടിയെ അപമാനിച്ച സംഭവത്തിൽ സംസ്ഥാന വനിതാ കമ്മീഷൻ സ്വമേധയാ കേസെടുത്തി​രുന്നു. പെരുമ്പാവൂർ ഡിവൈ.എസ്.പി യോട് റിപ്പോർട്ട് ആവശ്യപ്പെട്ടിട്ടുണ്ടെന്നും കിട്ടിയാലുടൻ തുടർ നടപടികളുണ്ടാകുമെന്നുംകമ്മീഷനംഗംഷിജി ശിവജി പറഞ്ഞു.