കോലഞ്ചേരി: കിഴക്കമ്പലം - മനയ്ക്കക്കടവ് - പട്ടിമ​റ്റം - നെല്ലാട് - പത്താംമൈൽ റോഡിന്റെ ദുർഗതിക്ക് പരിഹാരമാകുന്നു. റോഡ് നിർമ്മാണം പുനരാരംഭിക്കുന്നതിന് തീരുമാനമായതായി വി.പി. സജീന്ദ്രൻ എം.എൽ.എ അറിയിച്ചു. പുത്തൻകുരിശ് റസ്​റ്റ് ഹൗസിൽ വിളിച്ചുചേർത്ത വിവിധ വകുപ്പ് ഉദ്യോഗസ്ഥതല മീ​റ്റിംഗിലാണ് റോഡ് നിർമ്മാണ പ്രവൃത്തികൾ അടിയന്തരമായി പുനരാരംഭിക്കുന്നതിന് കർശന നിർദ്ദേശം. ശോച്യാവസ്ഥയിലായ റോഡിന്റെ ഭാഗങ്ങൾ ഉടൻ അ​റ്റകു​റ്റപ്പപണി നടത്തി ഗതാഗതയോഗ്യമാക്കും. റോഡിലെ കുടിവെള്ള വിതരണ പൈപ്പുകൾ മാ​റ്റിയിടുവാനുള്ള കാലതാമസമാണ് റോഡ് നിർമ്മാണം മന്ദഗതിയിലാക്കിയത്. പൈപ്പുകൾ മാ​റ്റിയിടുന്നതിന് മുൻപായി റോഡ് ഗതാഗതയോഗ്യമാക്കും . പൊതുമരാമത്ത് വകുപ്പ് മൂവാ​റ്റുപുഴ എക്‌സിക്യുട്ടീവ് എൻജിനിയർ ഷിജി കരുണാകരൻ, കെ.എസ്.ഇ. ബി എക്‌സിക്യുട്ടീവ് എൻജിനിയർമാരായ ജി. ഗിരിജ, ആശ, ജല അതോറി​ട്ടി തൃപ്പൂണിത്തുറ ഡിവിഷൻ എക്‌സിക്യുട്ടീവ് എൻജിനിയർ പ്രദീപ്,കുന്നത്തുനാട് ഡെപ്യൂട്ടി തഹസിൽദാർ കൃഷ്ണൻകുട്ടി തുടങ്ങിയവർ സംബന്ധിച്ചു.

# സർവേയ്ക്ക് തുടക്കം

റോഡ് വികസനത്തിന്റെ ഭാഗമായി ഇനിയും പൂർത്തീകരിക്കാനുള്ള ഡ്രൈനേജ് സംവിധാനങ്ങൾ ഉൾപ്പെടെയുള്ള പ്രവൃത്തികൾ ഉടൻ ആരംഭിക്കുന്നതിന് കർശന നിർദ്ദേശം നൽകി. റോഡ് പുറമ്പോക്ക് അളന്ന് തിട്ടപ്പെടുത്തുന്നതിനായുള്ള സർവേ ജോലികൾ ആരംഭിച്ചിട്ടുണ്ട്. ഇതിനായി സർവേയർമാരെ നിയോഗിച്ചിട്ടുണ്ട്. സർവേ ജോലികൾ ഉടൻ പൂർത്തീകരിക്കും.

# നവംബർ 30 നുള്ളിൽ പൈപ്പിടും

ഈ മാസം പൈപ്പിടൽ ആരംഭിച്ച് നവംബറിൽ പൂർത്തീകരിക്കും. നവംമ്പർ 30 നുള്ളിൽ പൈപ്പിടൽ പൂർത്തീകരിക്കുമെന്നും ടെൻഡർ നടപടികൾ പൂർത്തീകരിച്ച് കരാർ തീരുമാനിച്ചതായും എം.എൽ.എ പറഞ്ഞു. ഇതിനായി പൊതുമരാമത്ത് വകുപ്പും ജലഅതോറി​ട്ടിയും ചേർന്ന് സംയുക്ത സ്ഥലപരിശോധന നടത്തും. റോഡിന് വീതി വർദ്ധിപ്പിക്കുന്നതിന്റെ ഭാഗമായി വൈദ്യുത പോസ്​റ്റുകൾ റോഡിന്റെ വശങ്ങളിലേക്ക് മാ​റ്റി സ്ഥാപിക്കുന്ന പ്രവൃത്തികൾ സമയബന്ധിതമായി പൂർത്തീകരിക്കുന്നതിനും തീരുമാനമായി.

# റോഡ് നിർമ്മാണത്തിനും പൈപ്പുകൾ മാ​റ്റിയിടുന്നതിന് ചെലവ് ₹ 32.5 കോടി