പറവൂർ : പറവൂർ ശ്രീനാരായണ ജയന്തി ആഘോഷങ്ങൾക്കൊരുങ്ങി. എസ്.എൻ.ഡി.പി യോഗം പറവൂർ യൂണിയന്റെ നേതൃത്വത്തിൽ പറവൂർ പട്ടണത്തിൽ പതിമൂന്നിന് നടക്കുന്ന ജയന്തിദിന ഘോഷയാത്രയിൽ യൂണിയന്റെ കീഴിലുള്ള 72 ശാഖായോഗങ്ങളിൽ നിന്നുള്ള 20,000 ശ്രീനാരായണീയർ പങ്കെടുക്കും. ജില്ലയിലെ ഏറ്റവും വിപുലമായ ജയന്തി ആഘോഷം നടക്കുന്നത് പറവൂരിലാണ്. അക്ഷരാർത്ഥത്തിൽ പറവൂർ നഗരം അന്ന് പീതസാഗര മാകും.
രണ്ടരയ്ക്ക് പുല്ലംകുളം ശ്രീനാരായണ ഹയർ സെക്കൻഡറി സ്കൂളിൽ നിന്നും ഘോഷയാത്ര ആരംഭിക്കും. കെ.എം.കെ കവല, മുനിസിപ്പൽ കവല, കച്ചേരിപ്പടി, ചേന്ദമംഗലം കവല വഴി ഘോഷയാത്ര നഗരം ചുറ്റി സമ്മേളന വേദിയായ യൂണിയൻ ഓഡിറ്റോറിയത്തിൽ എത്തിച്ചേരും.
നറുക്കെടുപ്പിലൂടെയാണ് ശാഖായോഗങ്ങൾക്ക് ഘോഷയാത്രയിൽ മുൻഗണന ക്രമം. വാദ്യമേളങ്ങളും കലാരൂപങ്ങളും, നിശ്ചലദൃശ്യങ്ങളും ഘോഷയാത്രക്ക് പകിട്ടേകും. നഗരവീഥികളിലെ വ്യാപാര സ്ഥാപനങ്ങൾ ഘോഷയാത്രയെ വരവേൽക്കാൻ പീതവർണ്ണങ്ങളാൽ അലങ്കൃതമാകും. ഘോഷയാത്രയുമായി ബന്ധപ്പെട്ട് നിരവധി സമ്മാനങ്ങൾ യൂണിയൻ ഏർപ്പെടുത്തിയിട്ടുണ്ട്. വീഥികളുടെ ഇരുവശങ്ങളും പീതകൊടികളും തോരണങ്ങളും നിറഞ്ഞു കഴിഞ്ഞു.
വൈകിട്ട് അഞ്ചിന് ജയന്തി സമാപനസമ്മേളനം സ്വാമി ഗുരുരത്നം
പെൻഷൻ വിതരണോദ്ഘാടനം യൂണിയൻ വൈസ് പ്രസിഡന്റ് ഷൈജു മനയ്ക്കപ്പടി നിർവ്വഹിക്കും. യോഗം ഇൻസ്പെക്ടിംഗ് ഓഫീസർ ഡി. ബാബു ഡയറക്ടർ ബോർഡ് അംഗങ്ങളായ പി.എസ്. ജയരാജ്, എം.പി. ബിനു, യൂണിയൻ കൗൺസിലർമാരായ കെ.ബി. സുഭാഷ്, വി.എൻ. നാഗേഷ്, ഡി. പ്രസന്നകുമാർ, വനിതാ സംഘം യൂണിയൻ ചെയർപേഴ്സൺ ജയശ്രീടീച്ചർ, യൂത്ത് മൂവ്മെന്റ് യൂണിയൻ സമിതി പ്രസിഡന്റ് അഡ്വ. പ്രവീൺ തങ്കപ്പൻ തുടങ്ങിയവർ സംസാരിക്കും. യൂണിയൻ സെക്രട്ടറി ഹരി വിജയൻ സ്വാഗതവും യൂണിയൻ വനിതാ സംഘം ചെയർപേഴ്സൺ ജയശ്രീനന്ദിയും പറയും.
-------------------------------------------------------
എച്ച്.എം.ഡി.പി സഭയിൽ ജയന്തി ആഘോഷം.
വടക്കേക്കര ഹിന്ദുമത ധർമ്മ പരിപാലന സഭയുടെ ആഭിമുഖ്യത്തിൽ ജയന്തി ആഘോഷം 13ന് നടക്കും. രാവിലെ ആറിന് ശ്രീനാരായണമംഗലം ക്ഷേത്രത്തിൽ വിശേഷാൽപൂജ, ആറരയ്ക്ക് ഗുരുദേവ മണ്ഡപത്തിൽ ഗുരുപൂജ, എട്ടരയ്ക്ക് പതാക ഉയർത്തൽ, ഒമ്പതിന് ഘോഷയാത്ര, പത്തിന് ജയന്തിദിന സമ്മേളനത്തിൽ എച്ച്.എം.ഡി.പി സഭ പ്രസിഡന്റ് ബി. രാജീവ് അദ്ധ്യക്ഷത വഹിക്കും. പൂയ്യപ്പിള്ളി തങ്കപ്പൻ മുഖ്യപ്രഭാഷണം നടത്തും. സെക്രട്ടറി ടി.എസ്. ബിജിൽകുമാർ, ആഘോഷ കമ്മിറ്റി കൺവീനർ ടി.എസ്. സലീം തുടങ്ങിയവർ സംസാരിക്കും.