വൈപ്പിൻ : ശ്രീനാരായണ ഗുരുദേവ ജയന്തി ആഘോഷങ്ങളുടെ ഭാഗമായി എസ്.എൻ.ഡി.പി യോഗം വൈപ്പിൻ യൂണിയന്റെ ആഭിമുഖ്യത്തിൽ ഇന്നലെ വൈകീട്ട് പള്ളത്താംകുളങ്ങരയിൽ നിന്ന് ചെറായിലേക്ക് വർണശബളമായ ഘോഷയാത്ര നടന്നു. രാവിലെ യൂത്തുമൂവ്‌മെന്റിന്റെ ചതയദിന വിളംബര ഇരുചക്രവാഹനജാഥ മുനമ്പം ഗുരുദേവ ക്ഷേത്രസന്നിധിയിൽ യൂണിയൻ സെക്രട്ടറി പി.ഡി ശ്യാംദാസ് ഫ്‌ളാഗ് ഒഫ് ചെയ്തു. യൂണിയൻ പ്രസിഡൻറ് ടി.ജി വിജയൻ അദ്ധ്യക്ഷത വഹിച്ചു. ബോർഡ് മെമ്പർ കെ.പി. ഗോപാലകൃഷ്ണൻ, യൂത്ത് മൂവ്‌മെന്റ് പ്രസിഡന്റ് ബിനുരാജ് പരമേശ്വരൻ, സെക്രട്ടറി ഒ.എസ്. അഭിലാഷ്, യൂണിയൻ കൌൺസിലർമാർ തുടങ്ങിയവർ സംബന്ധിച്ചു. വിളംബരജാഥ വൈപ്പിൻ മുനമ്പം സംസ്ഥാന പാതയിലൂടെ സഞ്ചരിച്ച് വൈപ്പിൻസ്റ്റാൻഡ് വരെ എത്തി തുടർന്ന് പുതുവൈപ്പ് മഹാവിഷ്ണു ക്ഷേത്രാങ്കണത്തിലെ ഗുരുമണ്ഡപത്തിൽ പുഷ്പാർച്ചന നടത്തി സമാപിച്ചു.

വൈകീട്ട് 3.30 ന് പള്ളത്താംകുളങ്ങര ക്ഷേത്രമൈതാനിയിൽ നിന്ന് പുറപ്പെട്ട ഘോഷയാത്രയിൽ യൂണിയനിലെ 22 ശാഖകളും അണിനിരന്നു. പഞ്ചവാദ്യം, ചെണ്ട, തകിൽ, നാസിക്ക് ഡോൾ, ശിങ്കാരിമേളങ്ങൾ, കാവടി, തെയ്യം, വിവിധ ദേവീദേവൻമാരുടെ ദൃശ്യങ്ങൾ എന്നിവയോടെ അണി നിരന്ന ഘോഷയാത്രയിൽ പീതാംബരധാരികളായ ഗുരുദേവഭക്തരെ കൊണ്ട് തെരുവീഥികൾ നിറഞ്ഞു.

വൈകിട്ട് 6 ന് ചെറായി ഗൗരീശ്വര ക്ഷേത്രമൈതാനിയിൽ ജയന്തിദിന സമ്മേളനം ഹൈബി ഈഡൻ എം.പി ഉദ്ഘാടനം ചെയ്തു. വി.വി സഭ പ്രസിഡന്റ് ഇ.കെ. ഭാഗ്യനാഥൻ അദ്ധ്യക്ഷത വഹിച്ചു. മുഖ്യപ്രഭാഷണവും സമ്മാനവിതരണവും എസ്.ശർമ്മ എം.എൽ.എ നിർവഹിച്ചു. യൂണിയൻ സെക്രട്ടറി പി.ഡി. ശ്യാംദാസ് സ്വാഗതം പറഞ്ഞു.

യൂണിയൻ പ്രസിഡന്റ് ടി.ജി. വിജയൻ ചതയദിന സന്ദേശം നൽകി. വൈസ് പ്രസിഡന്റ് കെ.വി. സുധീശൻ, ബോർഡ് മെമ്പർ കെ.പി. ഗോപാലകൃഷ്ണൻ, വനിതാസംഘം കേന്ദ്രസമിതി പ്രസിഡന്റ് കെ.പി. കൃഷ്ണകുമാരി , വി.വി സഭാ സെക്രട്ടറി എ.എ. മുരുകാനന്ദൻ , സ്‌കൂൾ മാനേജർ അഡ്വ. എൻ.എസ്. അജയ്, വൈപ്പിൻ ബ്ലോക്ക് പഞ്ചായത്ത് പ്രസിഡന്റ് ഡോ. കെ. കെ. ജോഷി, പള്ളിപ്പുറം ഗ്രാമപഞ്ചായത്ത് പ്രസിഡന്റ് പി.കെ. രാധാകൃഷ്ണൻ, ജില്ലാ പഞ്ചായത്ത് അംഗം അയ്യമ്പിള്ളി ഭാസ്‌കരൻ, ബിനുരാജ് പരമേശ്വരൻ, ഒ.എസ്. അഭിലാഷ്, സുധീഷ് കുളങ്ങര, പി.വി. ഗോപി, കെ.എൻ. ഷിബു, ശാന്തിനി പ്രസാദ്, കല സന്തോഷ്, ഷീജ ഷെമൂർ, രാമചന്ദ്രൻ ശാന്തി, വി.എസ്. സനീഷ് ശാന്തി, കെ.ആർ. വിനീഷ്, കെ.പി. സന്തോഷ് എന്നിവർ പ്രസംഗിച്ചു.