കൊച്ചി : ജാതീയമായ ഉച്ചനീചത്വങ്ങളോടും അനാചാരങ്ങളോടും കലഹിച്ച കേരളത്തിന്റെ നവോത്ഥാന നായകനും സാമൂഹ്യ പരിഷ്കർത്താവുമായ ശ്രീനാരായണ ഗുരുദേവന്റെ മഹാസമാധി ദിനം നാടാകെ ആചരിച്ചു. ഒരു ജാതി,​ ഒരു മതം,​ ഒരു ദൈവം മനുഷ്യന് എന്ന ചിന്ത മാലോകർക്ക് പകർന്നു നൽകിയ ഗുരുദേവന്റെ 92ാം മഹാ സമാധി ദിനമായിരുന്നു ഇന്നലെ. ജില്ലയിലെ എസ്.എൻ.ഡി.പി ശാഖകളിലും ഗുരുദേവമന്ദിരങ്ങളിലും വിവിധ ശ്രീനാരായണ സംഘടനകളുടെ നേതൃത്വത്തിൽ പ്രാർത്ഥനകളും ഉപവാസയജ്ഞവും നടന്നു.

കണയന്നൂർ- ചോറ്റാനിക്കര എസ്.എൻ.ഡി.പി യോഗം ശാഖയിലെ ഉപവാസ പ്രാർത്ഥനയിൽ കേരളകൗമുദി അസിസ്റ്റന്റ് മാനേജർ പി.കെ മുരളീധരൻ,​ സുലേഖ എന്നിവർ പ്രഭാഷണം നടത്തി. തിരുവാങ്കുളം എസ്.എൻ.ഡി.പി യോഗം ശാഖയിൽ നന്ദകുമാർ,​ യോഗം മുൻഡയറക്ടർ പി.കെ മുരളീധരൻ എന്നിവർ പ്രഭാഷണം നടത്തി. തിരുവാങ്കുളം,​ കുരീക്കാട്,​ അമ്പാടിമല,​ കീച്ചേരി,​ കുലൈറ്റിക്കര,​ കാഞ്ഞിരമറ്റം,​ ആമ്പല്ലൂർ ശാഖകളിലും സമാധിദിനം ആചരിച്ചു. തെക്കൻ പറവൂർ ശാഖയിൽ ഉപവാസം ശാഖായോഗം പ്രസിഡന്റ് പി.വി സജീവ് ഉദ്ഘാടനം ചെയ്തു.