ചോറ്റാനിക്കര : ചോറ്റാനിക്കര ദേവീക്ഷേത്രത്തിലെ നവരാത്രി ആഘോഷം 29 ന് തുടങ്ങും. വൈകിട്ട് 6ന് സിനിമാ സംവിധായകൻ വിനയൻ കലാ സാംസ്കാരിക സമ്മേളനം ഉദ്ഘാടനം ചെയ്യും. കൊച്ചിൻ ദേവസ്വം ബോർഡ് പ്രസിഡന്റ് എ.ബി. മോഹനൻ അദ്ധ്യക്ഷത വഹിക്കും. ചലച്ചിത്രതാരം രമ്യാ നമ്പീശൻ വിശിഷ്ടാതിഥിയായിരിക്കും. രംഗപൂജ, കഥക്ക്, സൗപർണികയുടെ നൃത്തനൃത്യങ്ങൾ, തൃപ്പൂണിത്തുറ വനിതാ കഥകളി കേന്ദ്രത്തിന്റെ മേജർസെറ്റ് കഥകളി എന്നിവയും നടക്കും.

30 ന് രാവിലെ 7 ന് നവരാത്രി സംഗീതോത്സവം തുടങ്ങും. വൈകിട്ട് 4ന് തിരുവാതിരകളി, നൃത്താർച്ചന, ഭരതനാട്യം, രാത്രി 9 ന് മേജർസെറ്റ് കഥകളി. രണ്ടാംവേദിയിൽ ക്ലാസിക്കൽ ഫ്യൂഷൻ, ഭജൻസ്, നൃത്തനൃത്യങ്ങൾ. 1 ന് രാത്രി ഷൊർണൂർ സംഘത്തിന്റെ തോൽപ്പാവ കൂത്ത്, 2 ന് രാത്രി ഭക്തിഗാനമേള, 3 ന് നടനസന്ധ്യ, 4 ന് ശാസ്താംപാട്ട്, പ്രത്യേകം സജ്ജമാക്കുന്ന സരസ്വതി മണ്ഡപത്തിൽ 5 ന് വൈകിട്ട് 4ന് പൂജവയ്പ്, 6 ന് രാവിലെ 7 ന് നൃത്തോത്സവം, 8.30 ന് നടൻ ജയറാമിന്റെ പ്രമാണത്തിൽ ആറാം പവിഴമല്ലിത്തറമേളം, 7 ന് മഹാനവമിക്ക് പെരുവനം കുട്ടൻമാരാരുടെ പഞ്ചാരിമേളം, രാത്രി 8 ന് തിരുവനന്തപുരം എസ്.പി. തിയേറ്റേഴ്സിന്റെ ഘണ്ടാകർണൻ ബാലെ, 8.30 ന് ചോറ്റാനിക്കര വിജയൻമാരാരുടെ പ്രമാണത്തിൽ മേജർസെറ്റ് പഞ്ചവാദ്യത്തോടെ വിളക്കിനെഴുന്നള്ളിപ്പ്.

8 ന് രാവിലെ 8.30 ന് വിദ്യാരംഭം. പൂജയെടുപ്പും എഴുത്തിനിരുത്തും നടക്കും. നാടിന്റെ നാനാഭാഗങ്ങളിൽ നിന്നായി ആയിരങ്ങൾ ആദ്യക്ഷരം കുറിക്കാൻ എത്തും. കുട്ടികൾക്ക് പഴം, പഞ്ചാമൃതം, സാരസ്വതാരിഷ്ടം, ലഘുഭക്ഷണം എന്നിവ നൽകും. പിന്നൽ തിരുവാതിര, ഓട്ടൻതുള്ളൽ, അക്ഷരശ്ലോകസദസ്, നൃത്തനൃത്യങ്ങൾ, ഡബിൾ തായമ്പക, തിരുവാതിര, നൃത്താർച്ചന, വിളക്കിനെഴുന്നള്ളിപ്പ് എന്നിവയോടെ നവരാത്രിയാഘോഷം സമാപിക്കും.