കഞ്ഞിക്കുഴി :സർവ്വീസ് സഹകരണ ബാങ്കിന്റെ ആഭിമുഖ്യത്തിൽ പ്രളയബാധിതർക്കായി കെയർ ഹോം പദ്ധതിയിൽ നിർമ്മിച്ച 17 വീടുകളുടെ താക്കോൽ ദാനം ജില്ലാ പഞ്ചായത്ത് അംഗം വിഷ്ണു കെ. ചന്ദ്രൻ നിർവ്വഹിച്ചു. ചേലച്ചുവട് ചുരുളി പ്രിൻസ് ജോസഫ്, ഏഴു കമ്പി തുരുത്തേൽ സോഫിയാമ്മ എന്നിവർ താക്കോൽ ഏറ്റുവാങ്ങി. 5 മുതൽ 50 ശതമാനം വരെ വിലക്കുറവിൽ ജീവൻ രക്ഷാമരുന്നുകൾ ലഭ്യമാക്കുന്ന നീതി മെഡിക്കൽ സ്റ്റോറിന്റെ ഉദ്ഘാടനം ബ്ലോക്ക് പഞ്ചായത്ത് അംഗം ടോമി ജോസഫ് കുന്നേൽ നിർവ്വഹിച്ചു. പ്രാദേശിക വികസനവും വരുമാനവും ലക്ഷ്യമിട്ട് മത്സ്യകൃഷിയടക്കം സംരംഭങ്ങൾ ആരംഭിക്കുന്നതിന് കുടുംബശ്രീ വഴി 25000 രൂപ വരെ ലളിതമായ വ്യവസ്ഥയിൽ വായ്പ അനുവദിക്കുന്ന മുറ്റത്തെ മുല്ല വായ്പ പദ്ധതിയ്ക്കും ഇതോടൊപ്പം തുടക്കമായി. ജോയിന്റ് രജിസ്ട്രാർ എസ്.ഷേർളി ഉദ്ഘാടനം നിർവ്വഹിച്ചു. ബാങ്ക് പ്രസിഡന്റ് എം.കെ.ചന്ദ്രൻ കുഞ്ഞ് അദ്ധ്യക്ഷത വഹിച്ചു.. അസി. രജിസ്ട്രാർ വിജയൻ നമ്പൂതിരി മുഖ്യ പ്രഭാഷണം നടത്തി. ബാങ്ക് ഭരണസമിതി അംഗങ്ങളായ ബിജു പുരുഷോത്തമൻ സ്വാഗതവും വി.കെ.കമലാസനൻ നന്ദിയും പറഞ്ഞു.