കട്ടപ്പന: പുതുതലമുറയെ കാർഷിക മേഖലയിലേക്ക് ആകർഷിക്കുകയെന്ന ലക്ഷ്യത്തോടെ സംസ്ഥാന കാർഷിക വികസന കർഷക ക്ഷേമ വകുപ്പും പൊതുവിദ്യാഭ്യാസ വകുപ്പും കൈകോർത്തു നടപ്പാക്കുന്ന 'പാഠം ഒന്ന് ഏല്ലാവരും പാടത്തേയ്ക്ക് " പരിപാടിക്ക് മുന്നോടിയായി കൃഷി വകുപ്പിന്റെ നേതൃത്വത്തിൽ കട്ടപ്പനയിൽ വിദ്യാർത്ഥികൾക്കായി കാർഷിക പ്രശ്‌നോത്തരി മത്സരം സംഘടിപ്പിച്ചു. നെല്ലിന്റെ ജൻദിനമായി കണക്കാക്കുന്ന കന്നിമാസത്തിലെ മകം നക്ഷത്രനാൾ വരുന്ന സെപ്തംബർ 26നാണ് പാഠം ഒന്ന് ഏല്ലാവരും പാടത്തേക്ക് എന്ന പരിപാടി സംഘടിപ്പിക്കുന്നത്.

കട്ടപ്പന കൃഷി അസിസ്റ്റന്റ് ഡയറക്ടർ ഓഫീസ് പരിധിയിലുള്ള ആറ് ഗ്രാമപഞ്ചായത്തുകളിലെയും കട്ടപ്പന നഗരസഭയിലെയും സ്‌കൂളുകളിലെ ഹൈസ്‌കൂൾ, ഹയർ സെക്കണ്ടറി വിഭാഗങ്ങളിലെ വിദ്യാർത്ഥികൾക്കായാണ് മത്സരം സംഘിപ്പിച്ചത്. ഇരു വിഭാഗങ്ങളിൽ നിന്നും രണ്ടുപേരടങ്ങുന്ന ഓരോ ടീംവീതമാണ് പഞ്ചായത്തുക്കളെ പ്രതിനിധീകരിച്ചെത്തിയത്. കട്ടപ്പന നഗരസഭ ഹാളിൽ നടന്ന മത്സരം കട്ടപ്പന നഗരസഭ ചെയർമാൻ ജോയി വെട്ടിക്കുഴി ഉദ്ഘാടനം ചെയ്തു. കട്ടപ്പന കൃഷി അസിസ്റ്റന്റ് ഡയാറക്ടർ സുസൻ ബഞ്ചമിൻ അദ്ധ്യക്ഷത വഹിച്ചു. 10 റൗണ്ടുകളിലായി നടത്തിയ മത്സരത്തിൽ ഹൈസ്‌ക്കൂൾ വിഭാഗത്തിൽ എസ്.എം.എച്ച്.എസ് മേരികുളവും ഹയർ സെക്കണ്ടറി തലത്തിൽ കട്ടപ്പന സെന്റ് ജോർജ് ഹയർ സെക്കണ്ടറി സ്‌കൂളും വിജയികളായി.

കാർഷിക പ്രശ്‌നോത്തരിയുടെ ജില്ലാതല മത്സരം തൊടുപുഴ ജില്ലാ കൃഷി ഓഫീസിലെ താലൂക്ക് കോൺഫ്രൻസ് ഹാളിൽ നടന്നു. സംസ്ഥാന തല മത്സരം 20ന് തൃശൂരിൽ നടക്കും. കട്ടപ്പനയിൽ നടന്ന മത്സരം ഉപ്പുതറ കൃഷി ഓഫീസർ കെ.കെ.ബിനുമോൻ, കാഞ്ചിയാർ കൃഷി ഓഫീസർ റ്റിന്റുമോൾ ജോസഫ് എന്നിവർ നയിച്ചു. കൃഷി അസിസ്റ്റന്റ് ഓഫീസർമാരായ എ. അനീഷ്, , മനോജ് അഗസ്റ്റിൻ തുടങ്ങിയവർ പങ്കെടുത്തു.

കട്ടപ്പന എ ഡി എ ഓഫീസ് പരിധിയിലുള്ള എല്ലാ സ്‌കൂളുകളിലും കാർഷിക ക്ലബ്ബുകൾ രൂപികരിച്ചു കൊണ്ട് നെൽകൃഷിയുമായി ബന്ധപ്പെട്ട പ്രവർത്തനങ്ങൾ സെപ്തംബർ 26 ന് ആരംഭിക്കുമെന്ന് കട്ടപ്പന കൃഷി അസിസ്റ്റന്റ് ഡയറക്ടർ സൂസൻ ബഞ്ചമിൻ പറഞ്ഞു.