തൊടുപുഴ: ഡിസംബറിൽ ഉദ്ഘാടനം ചെയ്യത്തക്കവിധം മുട്ടം പൊലീസ് സ്റ്റേഷന്റെ നിർമ്മാണം അതിവേഗം പൂർത്തിയാകുന്നു. 3500 സ്‌ക്വയർഫീറ്റിലുള്ള ഇരുനിലകെട്ടിടത്തിന്റെ സ്ട്രക്ച്ചർ നിർമ്മാണം ഏകദേശം പൂർത്തിയായി. നിലവിലെ സ്റ്റേഷൻ നിലനിറുത്തിയാണ് പുതിയ കെട്ടിടം നിർമ്മിക്കുന്നതും. പുതിയ കെട്ടിടത്തിലേക്ക് മാറുന്നതിനനുസരിച്ച് പഴയ കെട്ടിടം ജീവനക്കാർക്കുള്ള ക്വാട്ടേഴ്‌സായി മാറ്റാനാണ് തീരുമാനം. കാലപഴക്കത്താൽ നാശത്തിന്റെ വക്കിലെത്തിയ മുട്ടം പൊലീസ് സ്റ്റേഷന് പുതിയ കെട്ടിടം വേണമെന്നുള്ളത് വർഷങ്ങളായിട്ടുള്ള ആവശ്യമായിരുന്നു. പുതിയ കെട്ടിടം നിർമ്മിക്കണമെന്നാവശ്യപ്പെട്ട് വിവിധ സംഘടനകൾ മാറി മാറി വന്ന സർക്കാരിൽ നിരവധി നിവേദനങ്ങൾ നൽകിയിരുന്നു. തുടർന്നാണ് ആഭ്യന്തര വകുപ്പിന്റെ പ്ലാൻ ഫണ്ടിൽ നിന്നുള്ള 85 ലക്ഷം രൂപ പുതിയ കെട്ടിട നിർമ്മാണത്തിനായി അനുവദിച്ചത്. 68 സെന്റ് സ്ഥലമാണ് മുട്ടം പൊലീസ് സ്റ്റേഷനുള്ളത്.

നിർമാണചുമതല 'സിൽക്കിന്"

സർക്കാർ ഏജൻസിയായ സ്റ്റീൽ ഇൻഡസ്ട്രിയൽ ലിമിറ്റഡ് കേരളയ്ക്കാണ് (സിൽക് ) നിർമ്മാണ ചുമതല. സിൽക്ക് ഉപകരാർ നൽകിയിരിക്കുന്ന എറണാകുളത്തെ സ്വകാര്യ കമ്പനിയാണ് മന്ദിരം നിർമ്മിക്കുന്നത്. ജില്ലയിൽ ഉടുമ്പഞ്ചോലയിലെയും കുളമാവിലെയും പൊലീസ് സ്റ്റേഷനുകളുടെ നിർമ്മാണവും സിൽക്കിന്റെ നേതൃത്വത്തിലാണ് പുരോഗമിക്കുന്നത്. ഒരു കോടി രൂപ വീതമാണ് ഇതിന്റെ നിർമ്മാണ ചെലവ്.

നിലവിൽ ദുരിതം മാത്രം

രമേശ്‌ ചെന്നിത്തല ആഭ്യന്തര മന്ത്രിയായിരിക്കെ 2016 ജനുവരി 12 നാണ് മുട്ടം ഔട്ട് പോസ്റ്റിനെ പൊലീസ് സ്റ്റേഷനായി ഉയർത്തിയത്. സ്റ്റേഷനായി ഉയർത്തിയെങ്കിലും സ്ഥലപരിമതി മൂലം ഇവിടെ ജോലി ചെയ്തിരുന്ന ഉദ്യോഗസ്ഥരുടെ അവസ്ഥ ദുരിതമായിരുന്നു. പൊതുജനം സ്റ്റേഷനിൽ എത്തിയാൽ സ്ഥലപരിമിതി കാരണം റോഡരികിലും കടകളുടെ വരാന്തയിലുമാണ് നിന്നിരുന്നത്. മഴ പെയ്താൽ സ്റ്റേഷനകത്തേക്ക് വെള്ളം തെറിച്ച് ഫയലുകൾക്കും മറ്റ് സാമഗ്രികൾക്കും നശിച്ചിരുന്നു. ഇടുങ്ങിയ സ്ഥലത്ത് ജോലി ചെയ്യാൻ വനിതകളായ ഉദ്യോഗസ്ഥർ ഏറെ കഷ്ടപ്പെട്ടിരുന്നു. വനിതകളുൾപ്പെടെ 36 ഉദ്യോഗസ്ഥരെയാണ് ഇവിടെ ജോലി ചെയ്യുന്നത്.

"കെട്ടിടത്തിന്റെ 80 ശതമാനം പണികളും പൂർത്തിയായി. ഡിസംബർ മാസത്തോടെ ഉദ്ഘാടനം ചെയ്യുന്നതിനായി ദ്രുതഗതിയിലാണ് ബാക്കിയുള്ള പണികൾ പുരോഗമിക്കുന്നത് "

- ബൈജു പി. ബാബു

(മുട്ടം എസ്.ഐ)

അത്യാധുനിക സൗകര്യങ്ങൾ

എസ്.ഐ, എ.എസ്.ഐ, എസ്.എച്ച്.ഒ, റൈറ്റർ എന്നിവർക്കുള്ള റൂം

 ഫ്രണ്ട് ഓഫീസ്, എട്ടോളം ശുചിമുറികൾ, ഉദ്യോഗസ്ഥർക്കുള്ള വിശ്രമ കേന്ദ്രം.  ആംസ് റൂം, റെക്കാഡ് ഫയൽ റൂം

 പുരുഷന്മാർക്കും വനിതകൾക്കും പ്രത്യേക ലോക്കപ്പുകൾ

 തൊണ്ടിമുതൽ സൂക്ഷിക്കാനുള്ള റൂം, കൺട്രോൾ റൂം