തൊടുപുഴ: മാനസികമായി പീഡിപ്പിക്കുന്നെന്ന് വനിതാ ജീവനക്കാർ ഒരു വർഷം മുമ്പ് നൽകിയ പരാതിയിൽ സെയിൽ ടാക്‌സ് ഓഫീസർക്ക് സസ്‌പെൻഷൻ. സെയിൽസ് ടാക്‌സ് (ജി.എസ്.ടി) തൊടുപുഴ സെക്കൻഡ് സർക്കിളിലെ ഓഫീസർ ജോസഫ് ആന്റണിയെയാണ് സെയിൽ ടാക്‌സ് (എസ്.ജി.എസ്.ടി) കമ്മിഷണർ സസ്‌പെൻഡ് ചെയ്തത്. ഓഫീസിലെ ജീവനക്കാരെ മാനസികമായി പീഡിപ്പിക്കുകയാണെന്ന് കാട്ടിയാണ് ഓഫീസിലെ ഏതാനും വനിത ജീവനക്കാർ കഴിഞ്ഞ വർഷം കമ്മിഷണർക്ക് പരാതി നൽകിയത്. അതേ സമയം ഓഫീസിന്റെ പ്രവർത്തനങ്ങൾ കെ.എസ്.ആർ ചട്ട പ്രകാരം വേണമെന്ന് കർശനമായ നിലപാട് എടുത്തതാണ് പരാതിക്ക് കാരണമെന്ന് പറയുന്നു. കൂടാതെ ജീവനക്കാരിൽ ചിലർ ജോലി സമയത്ത് ഭരണാനുകൂല സർവീസ് സംഘടനാ പ്രവർത്തനം നടത്തുന്നതു ചോദ്യം ചെയ്തതും പരാതിയ്ക്കു കാരണമായതായി പറയപ്പെടുന്നു.