ഇടുക്കി: വഴികാട്ടാൻ വാഗമൺ ഏകദിന മെഗാ ശുചീകരണത്തോടെ ഗാന്ധിജയന്തി വാരാഘോഷത്തിന് ജില്ലയിൽ തുടക്കമാകും. ഒക്ടോബർ രണ്ടിന് രാവിലെ 8.30 ന് വാഗമൺ പൊലീസ് സ്റ്റേഷൻ പരിസരത്ത് ഇ എസ് ബിജിമോൾ എംഎൽഎയുടെ നേതൃത്വത്തിൽ ത്രിതല പഞ്ചായത്ത് ജനപ്രതിനിധികൾ, ജില്ലാ ഭരണകൂടം, ഇൻഫർമേഷൻ പബ്ലിക് റിലേഷൻസ് വകുപ്പ്, ഹരിത കേരള മിഷൻ, ശുചിത്വമിഷൻ സർക്കാർ വകുപ്പുകൾ, സന്നദ്ധ സംഘടനകൾ, സ്റ്റുഡന്റ് പോലിസ് കേഡറ്റ്, എൻസിസി, എൻഎസ്എസ് , സാക്ഷരതാ മിഷൻ, കുടുംബശ്രീ, ജെ.ആർ.സി, സ്‌കൗട്ട് ആന്റ് ഗൈഡ് എന്നിവരുടെ സഹകരണത്തോടെയാണ് ശുചീകരണവും വാരാഘോഷവും സംഘടിപ്പിക്കുന്നത്. പുള്ളിക്കാനം ഇടുക്കുപാറ മുതൽ മൊട്ടക്കുന്ന് പൈൻകാട് വരെ ശുചീകരിക്കും. ആയിരത്തിലേറെ പേർ ശുചീകരണത്തിൽ പങ്കാളികളാകും. ജില്ലാ കളക്ടർ എച്ച്. ദിനേശൻ ശുചീകരണത്തിൽ പങ്കാളിയാകും.
ജൈവ മാലിന്യങ്ങളുടെ ശേഖരണം ഏലപ്പാറ പഞ്ചായത്തിൽ അന്ന് ആരംഭിക്കും. ജൈവ മാലിന്യങ്ങൾ ഉറവിടത്തിൽത്തന്നെ സംസ്‌കരിക്കണം. അജൈവ മാലിന്യങ്ങൾ ജൈവവാംശമില്ലാതെ വേണം സൂക്ഷിക്കാൻ. ശേഖരിച്ച പാഴ്വസ്തുക്കൾ കൈമാറുന്നതിന് ഗ്രീൻ കേരള കമ്പനിയുമായി ഉടൻ കരാറിലെത്തും.
ജില്ലയിൽ മൂന്നാറിലും പീരുമേട്ടിലുമായി ആയിരക്കണക്കിനു സ്വദേശ, വിദേശ വിനോദ സഞ്ചാരികൾ എത്തുന്നുണ്ട്. ഇതുമൂലം ഇവിടങ്ങളിൽ വൻതോതിൽ പ്‌ളാസ്റ്റിക് മാലിന്യങ്ങളും മറ്റും അടിഞ്ഞുകൂടുന്നു. ഇവ മഴക്കാലത്ത് ഓടകളിലും തോടുകളിലും മറ്റു ജല മാർഗങ്ങളിലും അടിഞ്ഞും അടഞ്ഞും വലിയ വെള്ളപ്പൊക്കത്തിനും അതുവഴി മറ്റ് പ്രകൃതി ദുരന്തങ്ങൾക്കും വഴിതെളിക്കുന്നു. മാത്രമല്ല, കുടിവെള്ളവും മണ്ണും വായുവും ഇതുമൂലം മലിനപ്പെടുന്നു. പ്ലാസ്റ്റിക് ക്യാരിബാഗ്, പ്ലാസ്റ്റിക് ഷീറ്റുകൾ, പ്ലാസ്റ്റിക് പ്ലേറ്റ്‌സ്, കപ്പുകൾ, ടംബ്‌ളറുകൾ, പൗച്ചുകൾ, പായ്ക്കറ്റുകൾ, സ്‌ട്രോ, കൊടികൾ,തെർമോകോൾ, സ്‌റ്റൈറോഫോം, പോളിപ്രൊപ്പലിൻ തുടങ്ങിയവ വലിച്ചെറിയുന്ന വസ്തുക്കളിൽപ്പെടുന്നു. പ്ലാസ്റ്റിക് തിന്നുന്നതു മൂലം വന്യമൃഗങ്ങളും ചാകുന്നുണ്ട്. ഇക്കാര്യത്തിൽ ശക്തമായ നടപടികൾ സ്വീകരിക്കാൻ യോഗം തീരുമാനിച്ചു.

ഹരിതകേരളം മിഷൻ ഇടുക്കി ജില്ലാ കോഓർഡിനേറ്റർ ജി.എസ് മധു, ഹരിതകേരളം മിഷൻ കോട്ടയം ജില്ലാ കോഓർഡിനേറ്റർ രമേശ് പി, അറക്കുളം പഞ്ചായത്ത് പ്രസിഡണ്ട് ടോമി കുന്നേൽ, ജില്ലാ ഇൻഫർമേഷൻ ഓഫീസർ എൻ സതീഷ്‌കുമാർ, ഏലപ്പാറ പഞ്ചായത്തംഗം മിനിമോൾ, തദ്ദേശ സ്വയംഭരണ ഭാരവാഹികൾ, വിവിധ വകുപ്പ് ജീവനക്കാർ തുടങ്ങിയവർ പങ്കെടുത്തു.