കാസർകോട്: ജലശക്തി അഭിയാൻ പദ്ധതിയുടെ ഭാഗമായി ജില്ലാ ഭൂഗർഭജല വകുപ്പിന്റെ ആഭിമുഖ്യത്തിൽ കുഴൽ കിണറുകളുടെ ഫ്ലഷിംഗ് ആരംഭിച്ചു. പരിപാടിയുടെ ഉദ്ഘാടനം കാസർകോട് കേന്ദ്രീയ വിദ്യാലയം രണ്ടിൽ ജില്ലാ കളക്ടർ ഡോ. ഡി. സജിത് ബാബു നിർവ്വഹിച്ചു.

ഭൂഗർഭ ജലവിതാനം ആശങ്കാജനകമായി താഴ്ന്നു കൊണ്ടിരിക്കുന്ന കാസർകോട് ബ്ലോക്കിലെ സർക്കാർ, പൊതുമേഖലാ സ്ഥാപനങ്ങൾ, കുടിവെള്ള പദ്ധതികൾ എന്നിവിടങ്ങളിലെ കുഴൽകിണറുകളെല്ലാം ഫ്ലഷ് ചെയ്ത് ശുദ്ധീകരിക്കാനാണ് പദ്ധതിയിലൂടെ ലക്ഷ്യമിടുന്നത്. ജലശക്തി അഭിയാൻ നോഡൽ ഓഫീസറായ ജില്ലാ മണ്ണ് സംരക്ഷണ ഓഫീസർ വി.എം. അശോക് കുമാർ, ഹൈഡ്രോളജിസ്റ്റ് ബി. ഷാബി, അസിസ്റ്റന്റ് എക്‌സിക്യൂട്ടീവ് എഞ്ചിനീയർ ഒ. രതീഷ്, ജൂനിയർ ഹൈഡ്രോളജിസ്റ്റ് ഡോ. കെ.എ പ്രവീൺ കുമാർ, ജൂനിയർ ജിയോ ഫിസിസിസ്റ്റ് ഇ.എം സുനിഷ, കേന്ദ്രീയ വിദ്യാലയ പ്രിൻസിപ്പാൾ കെ.പി തങ്കപ്പൻ സംബന്ധിച്ചു.

ഫോട്ടോ അടിക്കുറിപ്പ് (ഫ്‌ളഷിങ്)
ജലശക്തി അഭിയാൻ പദ്ധതിയുടെ ഭാഗമായി ഭൂഗർഭജല വകുപ്പിന്റെ ആഭിമുഖ്യത്തിൽ ആരംഭിക്കുന്ന കുഴൽ കിണറുകളുടെ ഫ്‌ളഷിംഗ് ഉദ്ഘാടനം കാസർകോട് കേന്ദ്രീയ വിദ്യാലയം രണ്ടിൽ ജില്ലാ കളക്ടർ ഡോ. ഡി. സജിത് ബാബു നിർവ്വഹിക്കുന്നു.

ഫ്ലഷിംഗ്.

കുഴൽ കിണറുകളിൽ അതിശക്തമായ വായു കടത്തി വിട്ട് വർഷങ്ങളായി അടിഞ്ഞു കൂടിയിരിക്കുന്ന ചെളിയും മാലിന്യങ്ങളും പുറത്തെത്തിക്കാനാണ് ഫ്ലഷിംഗ്. വകുപ്പിന്റെ കീഴിലുള്ള പ്രഫഷണൽ സംഘമാണ് യന്ത്രസാമഗ്രികളുടെ സഹായത്തോടെ ഫ്ലഷിംഗ് നടത്തുന്നത്.

ഭൂഗർഭപാളികളിൽ നിന്നും മറ്റും മണ്ണടിഞ്ഞു കൂടി കുഴൽ കിണറുകളുടെ ആഴം കുറഞ്ഞു വരികയും മലിനമാവുകയും ചെയ്യുന്നത് പതിവാണ്. അഞ്ച് വർഷത്തിലൊരിക്കലെങ്കിലും കുഴൽ കിണറുകളിൽ ഫ്‌ളഷിംഗ് നടത്തുന്നത് ആരോഗ്യകരമാണ്. ഭൂഗർഭജല വകുപ്പ് ജില്ലാ ഓഫീസർ ഡോ. കെ എം അബ്ദുൽ അഷ്‌റഫ്.