വൈക്കം: അമിതമായി വൈദ്യുതി പ്രവഹിച്ചതിനെ തുടർന്ന് വൈക്കം താലൂക്ക് ഓഫീസിലെ കമ്പ്യൂട്ടർ അടക്കമുള്ള വൈദ്യുത ഉപകരണങ്ങൾ തകരാറിലായി. ഇന്നലെ ഉച്ചയ്ക്ക് 12 ഓടെ വലിയ പൊട്ടിത്തെറിയോടെ വൈദ്യുതി കേബിളുകൾ കത്തി പുക ഉയന്നതോടെ ഓഫീസുകളിൽ എത്തിയവരും ജീവനക്കാരും പരിഭ്രാന്തരായി പുറത്തേക്കോടി. മിനിസിവിൽ സ്‌റ്റേഷനിലെ താലൂക്ക് ഓഫീസിലും ട്രഷറിയിലും വൈക്കം വില്ലേജ് ഓഫീസ്, ടൗൺ എംപ്ലോയ്‌മെന്റ് എക്‌സേഞ്ച് തുടങ്ങിയ ഓഫീസുകളിലും കമ്പ്യൂട്ടറുകൾ അടക്കമുള്ള വൈദ്യുത ഉപകരണങ്ങൾ തകരാറിലായതോടെ വിവിധാവശ്യങ്ങൾക്കായി എത്തിയവരുടെ സേവനങ്ങൾ മുടങ്ങി. വൈക്കം ടൗൺ എംപ്ലോയ്‌മെന്റ് എക്‌സേഞ്ചിലെ യു.പി.എസ്, നെറ്റ് വർക്ക്‌ കേബിൾ, സ്വിച്ച് തുടങ്ങിയവയ്ക്ക് കേടുപാടു സംഭവിച്ചു. ഇന്റർനെറ്റ് കണക്ഷനുമായി ബന്ധപ്പെട്ട കേബിളുവരെ കത്തിപ്പോയതിനാൽ പുതിയ കേബിൾ വലിച്ചു തകരാർ പരിഹരിച്ച ശേഷമേ ഉദ്യോഗാർഥികളുടെ രജിസ്‌ടേഷൻ ഉൾപ്പടെയുള്ള കാര്യങ്ങൾ നടക്കു. പരിശോധനയ്ക്ക് ശേഷമേ തകരാറിലായ ഉപകരണങ്ങൾ ഏതെക്കെയാണെന്ന് തിട്ടപ്പെടുത്തി നന്നാക്കാനാകുവെന്ന് താലൂക്ക് ഓഫീസ് അധികൃതർ പറഞ്ഞു.