കോട്ടയം: ശ്രീനാരായണഗുരുദേവന്റെ 92 ാമത് മഹാസമാധി അനുസ്മരണ ദിനാചരണം ഇന്ന് വിവിധ പരിപാടികളോടെ നാടെങ്ങും നടക്കും. ഗുരുദേവക്ഷേത്രങ്ങളും ഗുരുമന്ദിരങ്ങളും കേന്ദ്രീകരിച്ച് രാവിലെ മുതൽ ഉപവാസ പ്രാർത്ഥന, ഗുരുപൂജ, പുഷ്പാഞ്ജലി, സമൂഹപ്രാർത്ഥന, ശാന്തിയാത്ര, ഉച്ചക്ക് 3.15ന് സമാധി പ്രാർത്ഥന, തുടർന്ന് പ്രസാദവിതരണം എന്നിവയാണ് പ്രധാനപരിപാടികൾ. എസ്.എൻ.‌‌ഡി.പി യോഗം കോട്ടയം യൂണിയന്റെ ആഭിമുഖ്യത്തിൽ നാഗമ്പടം ഗുരുദേവക്ഷേത്രത്തിൽ സമാധിദിനാചരണം നടത്തും. മഹാസമാധിക്ക് മുമ്പ് ശ്രീനാരായണ ഗുരുദേവൻ അവസാനമായി പങ്കെടുത്ത പൊതുചടങ്ങുകൾ നടന്ന സ്ഥലമാണ് നാഗമ്പടം ക്ഷേത്രാങ്കണം. 1928 ജനുവരിയിൽ എസ്.എൻ.ഡി.പി യോഗത്തിന്റെ ഇരുപത്തിയഞ്ചാം വാർഷിക സമ്മേളനത്തോടനുബന്ധിച്ച് ആദ്യത്തെ 108 ശാഖകളുടെ സർട്ടിഫിക്കറ്റ് വിതരണം, ശിവഗിരി തീർത്ഥാടനാനുമതി തുടങ്ങിയ ചടങ്ങുകളിലാണ് ശ്രീനാരായണഗുരുദേവൻ സന്നിഹിതനായിരുന്നത്. അതുകൊണ്ടുതന്നെ നാഗമ്പടം ക്ഷേത്രാങ്കണം ഗുരുദേവന്റെ നിറസാന്നിദ്ധ്യം കുടികൊള്ളുന്ന സ്ഥലമായാണ് ശ്രീനാരായണഗുരുഭക്തർ വിശ്വസിക്കുന്നത്. ഇവിടെ നടക്കുന്ന സമാധി ദിനാചരണത്തിന് കോട്ടയം യൂണിയൻ പ്രസിഡന്റ് എം. മധു, സെക്രട്ടറി ആർ.രാജീവ്, വൈസ് പ്രസിഡന്റ് വി.എം.ശശി, വനിതാസംഘം, യൂത്തുമൂവ്മെന്റ് തുടങ്ങിയ പോഷക സംഘടനാ ഭാരവാഹികളും പരിപാടികൾക്ക് നേതൃത്വം നൽകും.

തളിയിൽക്കോട്ട ശാഖയിൽ രാവിലെ 8.30 മുതൽ ഉപവാസയജ്ഞം ആരംഭിക്കും. ഉച്ചക്ക് 1ന് ജയ ശ്രീകുമാർ ആനിക്കാട് പ്രഭാഷണം നടത്തും.

ആർപ്പൂക്കര ശാഖയിൽ രാവിലെ 6ന് ഗുരുപൂജ, 8ന് പുഷ്പാർച്ചന, 9 മുതൽ ഉപവാസം, ഉച്ചക്ക് 1ന് ശ്യാമള വിജയൻ പ്രഭാഷണം നടത്തും. പരിപ്പ് ശാഖയിൽ രാവിലെ 7 മുതൽ സമൂഹപ്രാർത്ഥന, ഗുരുപുഷ്പാഞ്ജലി, ജപം, ധ്യാനം, ഉപവാസം, ഉച്ചക്ക് 1 മുതൽ എസ്.എൻ.ഡി.പി യോഗം അസി. സെക്രട്ടറി രമേശ് അടിമാലിയുടെ പ്രഭാഷണം.

കോട്ടയം ടൗൺ (ബി) ശാഖയുടെ ആഭിമുഖ്യത്തിൽ കോടിമത കോ- ഓപ്പറേറ്റീവ് ബാങ്ക് ആഡിറ്റോറിയത്തിൽ രാവിലെ 11ന് വിശ്വശാന്തി സമ്മേളനം നടത്തും. ശാഖ സെക്രട്ടറി കെ.കെ. ശശിധരൻ സമ്മേളനം ഉദ്ഘാടനം ചെയ്യും. പ്രസിഡന്റ് എസ്. ദേവരാജ് അദ്ധ്യക്ഷത വഹിക്കും. ജയ ശ്രീകുമാർ പ്രഭാഷണം നടത്തും.

കോട്ടയം ടൗൺ (എ) ശാഖയിൽ രാവിലെ 9 മുതൽ ഉപവാസ പ്രാർത്ഥന, പ്രഭാഷണം, അയ്മനം ശാഖയിൽ രാവിലെ 6.30ന് ശാന്തിഹവനം, ഗുരുപൂജ, 10ന് സമൂഹപ്രാർത്ഥന, 11ന് അഖണ്ഡനാമജപം, 12.15ന് പ്രമോദ് വേളൂർ നടത്തുന്ന പ്രഭാഷണം, മറ്റക്കര ശാഖയിൽ രാവിലെ 7.30ന് ഗുരുദേവകൃതികളുടെ പാരായണം, 9 മുതൽ അഖണ്ഡനാമജപം, ഉച്ചക്ക് 1ന് ശാന്തിയാത്ര തുടങ്ങിയ പരിപാടികൾ നടക്കും

അയർക്കുന്നം ശാഖയിൽ 21 ന് രാവിലെ 6ന് ഗണപതിഹോമം, 6.30ന് ഗുരുപൂജ, 8ന് ശാന്തിഹവനം, 9ന് ഗുരുദേവകൃതികളുടെ പാരായണം, 11ന് ബാലചന്ദ്രൻ ചേർത്തല നടത്തുന്ന പ്രഭാഷണം എന്നിവയും നടക്കും.

മാങ്ങാനം ശ്രീനാരായണഗുരുദേവ ക്ഷേത്രത്തിൽ രാവിലെ 6 മുതൽ ഗുരുപൂജ, 10ന് ശാന്തിയാത്ര, 11ന് ഷൈലജ ചന്ദ്രൻ നടത്തുന്ന പ്രഭാഷണം, 3ന് അന്നദാനം തുടങ്ങിയ ചടങ്ങുകൾ നടക്കും.