പാലാ : നിയമസഭാ മണ്ഡലത്തിലെ ഉപതിരഞ്ഞെടുപ്പിനായി 176 പോളിംഗ് ബൂത്തുകളും ഒരുങ്ങി. ഇന്ന് രാവിലെ 7 മുതൽ വൈകിട്ട് 6 വരെയാണ് വോട്ടെടുപ്പ്. വോട്ടിംഗ് യന്ത്രങ്ങളുടെ പ്രവർത്തനം കൃത്യമെന്ന് ഉറപ്പാക്കുന്നതിനുള്ള മോക് പോൾ രാവിലെ 6 ന് ആരംഭിക്കും. എല്ലാ ബൂത്തുകളിലും 50 വോട്ടുകൾ ചെയ്ത് യന്ത്രങ്ങൾ ഉപയോഗസജ്ജമെന്ന് ഉറപ്പാക്കി, മോക്‌പോൾ ഫലം മായ്ച്ചതിനുശേഷമാകും വോട്ടിംഗിനായി സജ്ജമാക്കുക. വൈകിട്ട് ആറിന് ക്യൂവിലുള്ള എല്ലാവർക്കും വോട്ട് ചെയ്യാൻ അവസരം നൽകും. പാലാ കാർമൽ പബ്ലിക് സ്‌കൂളിലെ വിതരണ കേന്ദ്രത്തിൽ നിന്ന് പോളിംഗ് സാമഗ്രികൾ ഓരോ ബൂത്തിലേക്കും നിയോഗിക്കപ്പെട്ട പ്രിസൈഡിംഗ് ഓഫീസറും മൂന്നു പോളിംഗ് ഓഫീസർമാരും ചേർന്ന് ഏറ്റുവാങ്ങി. ഉച്ചയ്ക്ക് 1.30നുള്ളിൽ എല്ലാ ബൂത്തുകളിലേക്കുമുള്ള ഉദ്യോഗസ്ഥർ വിതരണ കേന്ദ്രത്തിൽ നിന്ന് പുറപ്പെട്ടു. പ്രത്യേകം ഏർപ്പെടുത്തിയ 44 വാഹനങ്ങളിൽ പൊലീസ് സംരക്ഷണത്തിലാണ് ഇവരെ കൊണ്ടുപോയത്. എല്ലാ സംഘങ്ങളും ഉച്ചകഴിഞ്ഞ് 3.15ന് മുൻപ് ബൂത്തുകളിലെത്തി.