തലയോലപ്പറമ്പ് : കാരിക്കോട്ടും പരിസര പ്രദേശങ്ങളിലും മോഷണം വർദ്ധിക്കുന്നതായി പരാതി. മൂന്ന് വീടുകളിലായി നാല് പ്രാവശ്യമാണ് കഴിഞ്ഞ രണ്ട് മാസത്തിനിടയിൽ മോഷണം നടന്നത്. റബർ ഷീ​റ്റ്, ഒട്ടുവള്ളി, വാഴക്കുല, ജാതിക്ക എന്നിവയാണ് മോഷ്ടിക്കുന്നത്. വെള്ളൂർ പൊലീസ് സ്​റ്റേഷന് സമീപം കയ്യൂരിക്കലിലാണ് മോഷണം നടന്നത്.കഴിഞ്ഞ ദിവസം മലയിൽ മാത്യൂവിന്റെ വീട്ടിലാണ് മോഷണം നടന്നത്. ഇവരുടെ പുറത്തെ അഴയിൽ ഉണക്കാനിട്ടതും അകത്ത് മുറിയിൽ സൂക്ഷിച്ചിരുന്നതുമായ റബർ ഷീ​റ്റും ഒട്ടുവള്ളിയുമാണ് മോഷ്ടാക്കൾ അപഹരിച്ചത്. മൂപ്പനത്ത് എം. സി ഔസേപ്പിന്റെ വീട്ടിൽ നിന്നും വില്പനക്കായി സൂക്ഷിച്ചിരുന്ന ജാതിക്കയാണ് മോഷണം പോയത്. കൂത്താകുളത്തിൽ പുത്തൻപുരയിൽ കെ. കെ ബേബിയുടെ പുരയിടത്തിൽ നിന്നിരുന്ന വാഴക്കുലകളും വീട്ടിൽ സൂക്ഷിച്ചിരുന്ന ജാതിക്കായും മോഷ്ടാക്കൾ കവർന്നു. തുടർച്ചയായി ഈ പ്രദേശത്ത് മോഷണം നടക്കുന്നതിനാൽ രാത്രി കാലങ്ങളിൽ ഇതു വഴിയുള്ള പൊലീസ് പെട്രോളിംഗ് ശക്തമാക്കണമെന്ന് നാട്ടുകാർ ആവശ്യപ്പെട്ടു.