ന്യൂഡൽഹി: ഇന്ത്യ അമേരിക്കയിൽ നിന്നു വാങ്ങുന്ന 22 അപ്പാഷെ എ.എച്ച്-64 ഇ ആക്രമണ ഹെലികോപ്ടറുകളിൽ എട്ടെണ്ണം ഇന്ന് വ്യോമസേനയുടെ ഭാഗമാകും. പത്താൻകോട്ടിലെ വ്യോമസേനാ താവളത്തിൽ നടക്കുന്ന ചടങ്ങിലാണ് ഹെലികോപ്ടറുകൾ ഔദ്യോഗികമായി കൈമാറുക. എയർ ചീഫ് മാർഷൽ ബി.എസ്. ധനോവ മുഖ്യാതിഥിയാകും.
ആദ്യ ഘട്ടമായി 4 ഹെലികോപ്ടറുകൾ ജൂലായ് 27ന് ഇന്ത്യയിൽ എത്തിച്ചിരുന്നു. 2020 ഓടുകൂടി മുഴുവൻ ഹെലികോപ്ടറുകളും വ്യോമസേനയ്ക്ക് സ്വന്തമാകും.
റഷ്യൻ നിർമ്മിത എം.ഐ-25, എം.ഐ-23 ഹെലികോപ്ടറുകളാണ് ഇന്ത്യൻ വ്യോമസേന നിലവിൽ യുദ്ധമുഖത്ത് ഉപയോഗിക്കുന്നത്. അപ്പാഷെ ഫ്ളീറ്റും സജ്ജമാകുന്നതോടെ സേനയ്ക്ക് വലിയ മുതൽക്കൂട്ടാകും.
അമേരിക്കൻ വ്യോമസേനയുടെ അഭിമാന പോരാളിയാണ് അപ്പാഷെ എ.എച്ച് - 64 ഇ. ഇവ വാങ്ങാനായി 2015 സെപ്തംബറിലാണ് അമേരിക്കൻ വിമാനക്കമ്പനിയായ ബോയിംഗ് ലിമിറ്റഡുമായി ഇന്ത്യ കരാറൊപ്പിട്ടത്. 6800 കോടി രൂപയുടെ ഇടപാടണിത്. ഇതുകൂടാതെ, ആയുധ സംവിധാനമുൾപ്പെടെ (ഹെൽഫയർ മിസൈൽ സഹിതം) ആറ് അപ്പാഷെ ഹെലികോപ്ടറുകൾ കൂടി വാങ്ങാൻ 2017ലും ബോയിംഗുമായി കരാറൊപ്പിട്ടു. 4168 കോടിയുടേതാണ് ഈ കരാർ. അപ്പാഷെ ഹെലികോപ്ടറുകളുടെ സേവനം പ്രയോജനപ്പെടുത്തുന്ന 14-ാമത്തെ രാജ്യമാണ് ഇന്ത്യ.
ഹെലികോപ്ടർ പറത്താൻ വ്യോമസേനാംഗങ്ങളിൽ തിരഞ്ഞെടുത്തവർക്ക്‌ യു.എസ് സൈന്യം പരിശീലനം നൽകുന്നുണ്ട്.
കൂടുതൽ സൈനികരെയും ആയുധങ്ങളും ഇന്ധനവും വളരെ പെട്ടെന്ന്‌ യുദ്ധമുഖത്തേക്കെത്തിക്കാൻ സഹായിക്കുന്ന ചിനൂക് ഹെലികോപ്ടറുകൾ വ്യോമസേന ബോയിംഗിൽ നിന്ന് നേരത്തേ വാങ്ങിയിരുന്നു.
കിടിലൻ പോരാളി
അത്യാധുനിക ആക്രമണ സംവിധാനമുള്ളതാണ് അപ്പാഷെ ഹെലികോപ്ടർ
ഇതിലെ ഹെൽഫയർ മിസൈൽ ശത്രുവിനെ ഞൊടിയിടയിൽ തകർക്കും
മിനിട്ടിൽ 128 ലക്ഷ്യം വരെ കണ്ടെത്താനുള്ള ശേഷി ഇതിലെ റഡാറിനുണ്ട്
ഏത് കാലാവസ്ഥയിലും ഉപയോഗിക്കാം, ആകാശത്തും കരയിലും കൃത്യത