ന്യൂഡൽഹി: സി.ബി.ഐ കസ്റ്റഡിയിലായിരിക്കുമ്പോഴും കേന്ദ്ര സർക്കാരിനെ വിമർശിക്കാനായി വീണു കിട്ടിയ അവസരം കോൺഗ്രസ് നേതാവും മുൻ കേന്ദ്ര മന്ത്രിയുമായ പി.ചിദംബരം പാഴാക്കിയില്ല. സി.ബി.ഐ ഉദ്യോഗസ്ഥരും പൊലീസുകാരും കൂടെയുള്ളപ്പോഴാണ് രാജ്യത്തിൻറെ നിലവിലെ ജി.ഡി.പി വളർച്ചാ നിരക്ക് സൂചിപ്പിച്ച് കൊണ്ട് വലം കൈയിലെ അഞ്ച് വിരലുകൾ ഉയർത്തിക്കാട്ടി 'അഞ്ച് ശതമാനം' എന്ന് അദ്ദേഹം പറഞ്ഞത്.'സർ, നിങ്ങൾക്ക് എന്തെങ്കിലും പറയാനുണ്ടോ? 15 ദിവസമായി താങ്കൾ കസ്റ്റഡിയിലല്ലേ?' എന്ന മാദ്ധ്യമ പ്രവർത്തകന്റെ ചോദ്യത്തിനാണ് ചിദംബരം ഇത്തരത്തിൽ ഹ്രസ്വമായ മറുപടി നൽകിയത്.
A quick reminder by @PChidambaram_IN on why he's feared by the BJP govt. #ModiMadeEconomicCrisis pic.twitter.com/9XOdVf6saT
'എന്താണ് 5 ശതമാനം? അഞ്ച് ശതമാനം നിങ്ങൾക്ക് ഓർമയില്ലേ?' എന്നും മാദ്ധ്യമപ്രവർത്തകനോട് ചിദംബരം ചോദിച്ചു. ഇതിന്റെ വീഡിയോ ദൃശ്യം ഇപ്പോൾ പുറത്ത് വന്നിട്ടുണ്ട്. ചിദംബരത്തിന്റെ ചോദ്യത്തിന് 'ജി.ഡി.പി അല്ലേ? എന്ന് മാദ്ധ്യമപ്രവർത്തകൻ മറുചോദ്യം ചോദിക്കുന്നതും ചിദംബരം പെട്ടെന്ന് നടന്നകലുന്നതും വീഡിയോയിൽ കാണാം.'പി. ചിദംബരം ഇന്ത്യൻ സമ്പത്ത് വ്യവസ്ഥയുടെ നിലവിലെ അവസ്ഥയെക്കുറിച്ച്' എന്ന തലക്കെട്ടോടു കൂടി ഈ വീഡിയോ അദ്ദേഹത്തിന്റെ മകൻ കാർത്തി ചിദംബരം ട്വിറ്ററിൽ പങ്കുവച്ചിട്ടുണ്ട്.
'എന്തുകൊണ്ട് ബി.ജെ.പി സർക്കാർ ചിദംബരത്തെ ഭയപ്പെടുന്നു എന്നതിനെ കുറിച്ച് അദ്ദേഹത്തിന്റെ ഒരു ഓർമ്മപ്പെടുത്തൽ' എന്ന് കുറിച്ചുകൊണ്ട് കൊണ്ട് ഇന്ത്യൻ നാഷണൽ കോൺഗ്രസിന്റെ ട്വിറ്റർ ഹാൻഡിലും ഈ വീഡിയോ പങ്കുവച്ചു. നിലവിൽ രാജ്യത്തിൻറെ ജി.ഡി.പി വളർച്ചാ നിരക്ക് അഞ്ച് ശതമാനമാണ്. കഴിഞ്ഞ ഏഴ് വർഷത്തിലെ ഏറ്റവും കുറഞ്ഞ വളർച്ചാ നിരക്കാണിത്.ഐ.എൻ.എക്സ് മീഡിയയുമായി നടത്തിയ അനധികൃത ഇടപാടിന്റെ പേരിലാണ് ചിദംബരം ഇപ്പോൾ അന്വേഷണം നേരിടുന്നത്.