ലണ്ടൻ: ഇറാൻ പിടിച്ചെടുത്ത ബ്രിട്ടിഷ് എണ്ണക്കപ്പൽ സ്റ്റെന ഇംപറോയിലെ ഇന്ത്യക്കാരുൾപ്പെടെയുള്ള ഏഴ് ജീവനക്കാരെ ഉടൻ വിട്ടയയ്ക്കുമെന്ന് റിപ്പോർട്ട്. ഇന്ത്യക്കാരിൽ മലയാളികളുമുണ്ടെന്നാണ് വിവരം. 23 ഇന്ത്യക്കാരാണ് കപ്പലിലുള്ള ജീവനക്കാർ.

ജൂലായ് 19നാണ് ബ്രിട്ടന്റെ എണ്ണക്കപ്പലായ സ്റ്റെന ഇംപറോ ഹോർമൂസ് കടലിടുക്കിൽ വച്ച് ഇറാൻ പിടിച്ചെടുത്തത്. ഉപരോധം ലംഘിച്ച് സിറിയയിലേക്ക് എണ്ണ കടത്തുന്നു എന്നാരോപിച്ച് ഗ്രേസ് 1 എന്ന ഇറാനിയൻ എണ്ണക്കപ്പൽ ബ്രിട്ടൻ പിടിച്ചെടുത്തതിന് പ്രതികാരമായി ആയിരുന്നു നടപടി. ഗ്രേസ് 1 ആഗസ്റ്റിൽ ബ്രിട്ടൻ വിട്ടയച്ചിരുന്നു.

കപ്പലിലെ ജീവനക്കാരുമായി യാതൊരു പ്രശ്നങ്ങളുമില്ലെന്ന് ഇറാൻ വിദേശ കാര്യവക്താവ് അബ്ബാസ് മൗസവി പറഞ്ഞതായി റോയിട്ടേഴ്സ് റിപ്പോർട്ട് ചെയ്തു. മാനുഷിക പരിഗണന വച്ചാണ് ഇവരെ വിട്ടയയ്ക്കുന്നതെന്നും അദ്ദേഹം പറഞ്ഞു. ഏഴ് ജീവനക്കാരെയും മോചിപ്പിക്കുന്നതിനുള്ള നടപടികൾ പുരോഗമിക്കുകയാണ്. എത്രയും വേഗം അവർക്ക് കുടുംബാംഗങ്ങളെ കാണാനാകും. അവരെ എന്ന് വിട്ടയയ്ക്കാനാകുമെന്നതു സംബന്ധിച്ച ഔദ്യോഗിക തീരുമാനത്തിനായി ഞങ്ങൾ കാത്തിരിക്കുകയാണെന്നും കപ്പലിന്റെ ഉടമസ്ഥനായ സ്വീഡൻ സ്വദേശി പറഞ്ഞു.