ലാഹോർ: പാകിസ്ഥാൻ ക്രിക്കറ്റിലെ സ്​പിൻ ഇതിഹാസം അബ്​ദുൾ ഖാദർ (63) അന്തരിച്ചു. ഹൃദയാഘാതത്തെ തുടർന്ന്​ ലാഹോറിലായിരുന്നു അന്ത്യം. സെപ്​റ്റംബർ 15ന്​ ത​ന്റെ 64ാം പിറന്നാൾ ആഘോഷിക്കാനുള്ള ഒരുക്കത്തിനിടെയാണ്​​ അബ്ദുൾ ഖാദറിന്റെ അന്ത്യം. 1970, 80 കാലഘട്ടങ്ങളിൽ പാക്​ ബൗളിംഗിന്റെ നെടുംതൂണായിരുന്നു അബ്​ദുൾ ഖാദർ.

എതിർ ബാറ്റ്​സ്​മാൻമാരെ ആശയക്കുഴപ്പത്തിലാക്കുന്ന ഡാൻസിംഗ്​ ആക്​ഷനും ടേണുംകൊണ്ട് ​ലെഗ്​ സ്​പിന്നി​നെ പരിഷ്കരിച്ച ബൗളറായിരുന്നു അബ്ദുൾ ഖാദർ. കൈവിരലുകളിൽ ഒളിപ്പിച്ച മാന്ത്രികതയുമായി ക്രീസിനെ അദ്ദേഹം അടക്കിവാണപ്പോൾ അതേ മാതൃക പിന്തുടർന്ന്​ ഒരുപിടി സ്​പിൻ ഇതിഹാസങ്ങൾ വളർന്നു.

മുഷ്​താഖ് അഹമ്മദ്​​, ഷെയ്​ൻ വോൺ തുടങ്ങിയവരുടെ ഗുരുതുല്യനും കൂടിയായിരുന്നു ഖാദർ. 1977 ഡിസംബർ 14ന്​ ഇംഗ്ലണ്ടിനെതിരായ ടെസ്​റ്റ്​ മത്സരത്തിലൂടെയായിരുന്നു അരങ്ങേറ്റം. 1990 വരെ ടെസ്​റ്റ്​ കളിച്ചു.

67 മത്സരങ്ങളിൽ 236 വിക്കറ്റുകൾ സ്വന്തം പേരിലാക്കി. 1983 ജൂണിൽ ന്യൂസിലൻഡിനെതിരായിരുന്നു ഏകദിന അരങ്ങേറ്റം. 1993ൽ വിരമിക്കു​മ്പോഴേക്കും 132 വിക്കറ്റുകളും നേടി. 1987ൽ ഇംഗ്ലണ്ടിനെതിരെ ഒരു ഇന്നിംഗ്സിൽ ഒമ്പതു വിക്കറ്റ്​ വീഴ്​ത്തിയതായിരുന്നു ഏറ്റവും മികച്ച വ്യക്​തിഗത പ്രകടനം. ആ പരമ്പരയിൽ മൂന്ന്​ ടെസ്​റ്റിലായി 30 വിക്കറ്റു വീഴ്​ത്തി.

ഗൂഗ്ലിയും ഫ്ലിപ്പറും ആയുധമാക്കിയാണ്​ ഖാദർ 70-80 കാലഘട്ടത്തിൽ പാകിസ്​താൻ ബൗളിംഗിന്റെ നെടുംതൂണായി വാണത്​. ഏതാനും മത്സരങ്ങളിൽ പാകിസ്​താൻ നായകനുമായിരുന്നു. വിരമിച്ച ശേഷം പാക്​ സെലക്​ടറായും കമന്റേറ്ററായും പ്രവർത്തിച്ചു. ക്രിക്കറ്റർ ഉമർ അക്​മൽ മരുമകനാണ്