ശ്രീനഗർ: ജമ്മു കാശ്മീരിലെ സോംപോറിലുണ്ടായ വെടിവയ്പ്പിൽ രണ്ടുവയസുകാരി ഉൾപ്പെടെ നാലുപേർക്ക് പരിക്കേറ്റു. ഡാംഗര്‍പുരയിൽ സാധാരണക്കാർക്കു നേരെയാണ് വെടിവയ്പ്പുണ്ടായത്. പരിക്കേറ്റവരെ ആശുപത്രിയിൽ പ്രവേശിപ്പിച്ചു. പരിക്കേറ്റവർ ഒരു കുടുംബത്തിലെ അംഗങ്ങളാണെന്ന് റിപ്പോർട്ട്.

പ്രദേശത്തെ പഴക്കച്ചവടക്കാരന്റെ വീടിനു നേർക്കാണ് ഭീകരവാദികളുടെ വെടിവയ്പ്പുണ്ടായത്. കാശ്മീരിന്റെ പ്രത്യേകപദവി റദ്ദാക്കിയ കേന്ദ്രനടപടിയോടുള്ള പ്രതിഷേധസൂചകമായി കട തുറക്കരുതെന്ന് ഭീകരവാദികൾ ഇവർക്ക് മുന്നറിയിപ്പ് നൽകിയിരുന്നു. എന്നാൽ, ഇവർ ഈ മുന്നറിയിപ്പ് ലംഘിച്ചതാണ് ഭീകരവാദികളുടെ വെടിവയ്പ്പിന് കാരണമായതെന്ന് ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നു. ആരുടെയും നില ഗുരുതരമല്ലെന്നാണ് സൂചന. പൊലീസ് സ്ഥലത്തെത്തി അന്വേഷണം ആരംഭിച്ചു.