പടിയിറക്കം പിറന്നാൾ ദിനത്തിൽ
ബെയ്‌ജിംഗ്: ഒരു ചെറിയ കൂരയിൽ തുടങ്ങി, പിന്നീട് ലോകമാകെ വളർന്ന് പന്തലിച്ച പ്രമുഖ ചൈനീസ് ഇ-കൊമേഴ്‌സ് കമ്പനി ആലിബാബയുടെ സ്ഥാപക ചെയർമാനും ഏഷ്യയിലെ അതി സമ്പന്നരിൽ ഒരാളുമായ ജാക്ക് മാ രാജിവച്ചൊഴിഞ്ഞു. ഇന്നലെ മായുടെ 55-ാം പിറന്നാളായിരുന്നു. ആലിബാബയ്ക്ക് തുടക്കമിടും മുമ്പ് ഇംഗ്ളീഷ് അദ്ധ്യാപകനായിരുന്നു മാ. അദ്ധ്യാപന ജീവിതത്തിലേക്ക് മടങ്ങാനാണ് ആഗ്രഹമെന്ന് മാ വ്യക്തമാക്കിയിട്ടുണ്ട്.
3,840 കോടി ഡോളറിന്റെ വ്യക്തിഗത ആസ്‌തി ഇപ്പോൾ മായ്‌ക്കുണ്ട്. 20 വർഷങ്ങൾക്ക് മുമ്പ് കിഴക്കൻ ചൈനയിലെ ഹാങ്‌ചൗ നഗരത്തിലായിരുന്നു ആലിബാബയ്ക്ക് മാ തുടക്കമിട്ടത്. ഇന്ന് 46,000 കോടി ഡോളറിന്റെ ആസ്‌തിയും ഒരുലക്ഷത്തിലേറെ ജീവനക്കാരുമുള്ള കമ്പനിയാണിത്. ആലിബാബയും ചൈനയുടെ ഇ-കൊമേഴ്‌സ് വിപണിയും വളർച്ചയുടെ പുതിയ കുതിപ്പ് നേടുന്ന വേളയിലാണ് മായുടെ പടിയിറക്കം.
ആഡംബര റീട്ടെയിൽ ഉത്‌പന്ന വിതരണ ശൃംഖലയായ കഓള, മറ്റൊരു മ്യൂസിക് സ്‌ട്രീമിംഗ് കമ്പനി എന്നിവയിൽ 270 കോടി ഡോളർ നിക്ഷേപം നടത്തുമെന്ന് അടുത്തിടെ ആലിബാബ പ്രഖ്യാപിച്ചിരുന്നു. 2019ന്റെ ആദ്യ പകുതിയിൽ ചൈനീസ് ഇ-വിപണി 17.8 ശതമാനം വളരുകയും ചെയ്‌തു. മായുടെ വിശ്വസ്‌തനായ ഡാനിയേൽ ഷാംഗ് ആണ് പുതിയ ചെയർമാൻ. ആലിബാബയ്ക്ക് വളരാൻ പുതിയ മേഖലകൾ കണ്ടെത്തുകയാണ് ഡാനിയേലിന്റെ പ്രധാന വെല്ലുവിളി.