ന്യൂഡൽഹി: ഇന്ത്യയുടെ സമ്പ‌ദ്‌രംഗം മെച്ചപ്പെടുന്നുവെന്ന സൂചന നൽകി ആഗസ്‌റ്റിൽ ഇന്ധന ഉപഭോഗം 2.8 ശതമാനം വർദ്ധിച്ചു. മൊത്തം 17.04 മില്യൺ ടൺ ഇന്ധനമാണ് കഴിഞ്ഞമാസം ഇന്ത്യക്കാർ വാങ്ങിയതെന്ന് പെട്രോളിയം മന്ത്രാലയത്തിന് കീഴിലുള്ള പെട്രോളിയം പ്ളാനിംഗ് ആൻഡ് അനാലിസിസ് സെൽ (പി.പി.എ.സി)​ വ്യക്തമാക്കി.

പെട്രോൾ (ഗാസോലിൻ)​ വില്‌പന വർദ്ധന 8.9 ശതമാനമാണ്. 2.57 മില്യൺ ടൺ പെട്രോൾ ആഗസ്‌റ്റിൽ വിറ്റഴിഞ്ഞു. പാചക വാതകം (എൽ.പി.ജി)​ വിതരണം 13 ശതമാനം വർദ്ധിച്ച് 2.40 മില്യൺ ടണ്ണിലെത്തി. നാഫ്‌ത വില്‌പന 3.7 ശതമാനം ഉയർന്ന് 1.15 മില്യൺ ടണ്ണിലുമെത്തി. റോഡ് നിർമ്മാണത്തിനും മറ്റും ഉപയോഗിക്കുന്ന ബിറ്റുമെൻ വില്‌പന വളർച്ച 23.8 ശതമാനമാണ്. അതേസമയം,​ ഫ്യുവൽ ഓയിൽ വില്‌പന 15.9 ശതമാനം കുറഞ്ഞു.

നടപ്പു സാമ്പത്തിക വർഷത്തെ ആദ്യപാദമായ ഏപ്രിൽ-ജൂണിൽ ഇന്ധന ഉപഭോഗം കുത്തനെ ഇടിഞ്ഞിരുന്നു. സമ്പദ്‌വളർച്ച (ജി.ഡി.പി)​ നിർണയിക്കുന്ന മുഖ്യ ഘടകങ്ങളിലൊന്നാണ് ഇന്ധന ഉപഭോഗം. ജൂണിൽ എൽ.പി.ജി ഏഴ് ശതമാനം,​ നാഫ്‌ത 0.76 ശതമാനം,​ മണ്ണെണ്ണ 17 ശതമാനം,​ ബിറ്റുമെൻ 11 ശതമാനം എന്നിങ്ങനെ ഇടിഞ്ഞിരുന്നു. ഏപ്രിൽ-ജൂണിൽ ജി.ഡി.പി വളർച്ച അ‌്ചു ശതമാനത്തിലേക്ക് കുറയുകയും ചെയ്‌‌തു. അതേസമയം,​ ജൂലായിൽ ഇന്ധന ഉപഭോഗം 3.3 ശതമാനം വളർന്നു.