ന്യൂഡൽഹി: ക്രിക്കറ്റ്- സിനിമാ പ്രേമികൾക്ക് ഏറ്റവും പ്രിയപ്പെട്ട താരദമ്പദികളാണ് വിരാട് കോഹ്ലിയും അനുഷ്ക ശർമ്മയും. കഴിഞ്ഞ ദിവസം ന്യൂഡൽഹിയിലെ ഫിറോസ് ഷാ കോട്‌ലാ സ്‌റ്റേഡിയത്തിന്റെ പേര് മാറ്റുന്ന ചടങ്ങിനിടെയുള്ള ഒരു വീഡിയോ ആണ് സോഷ്യൽ മീഡിയയിൽ വെെറലാകുന്നത്. അന്തരിച്ച മുൻ കേന്ദ്രമന്ത്രിയും ബി.ജെ.പി നേതാവുമായിരുന്ന അരുൺ ജെയ്റ്റിലിയുടെ പേരിലാണ് ഫിറോസ് ഷാ കോട്‌ലാ സ്‌റ്റേഡിയം ഇനിമുതൽ അറിപ്പെടുക.

ന്യൂഡൽഹിയിലെ ജവഹർലാൽ നെഹ്‌റു സ്റ്റേഡിയത്തിലെ വെയ്റ്റ് ലിഫ്റ്റിങ് ഓഡിറ്റോറിയത്തിലാണ് പുനർനാമകരണ ചടങ്ങ് നടന്നത്. സ്റ്റേഡിയത്തിലെ പുതിയ പവലിയൻ ഇന്ത്യന്‍ ക്യാപ്റ്റൻ വിരാട് കോഹ്ലിയുടെ പേരും നൽകിയിരുന്നു. അച്ഛൻ മരിച്ചിട്ടും രഞ്ജി ട്രോഫിയിൽ ഡൽഹിക്കു വേണ്ടി കളിക്കാനിറങ്ങിയ കോഹ്ലിയുടെ അർപ്പണമനോഭാവത്തേയും ധീരതയേയും കുറിച്ച് അരുൺ ജെയ്റ്റ്‌ലി എപ്പോഴും പറയാറുണ്ടായിരുന്നുവെന്ന് ചടങ്ങിനിടെ ഡി.ഡി.സി.എ പ്രസിഡന്റ് രജത് ശർമ്മ ചൂണ്ടിക്കാട്ടിയപ്പോഴാണ് താരത്തിന്റെ കണ്ണ് നിറഞ്ഞത്.

ഇതോടെ അനുഷ്‌ക കോഹ്ലിലെ ചുംബനത്തിലൂടെ ആശ്വസിപ്പിക്കുകയായിരുന്നു. കോഹ്ലിയുടെ കൈ കോർത്തുപിടിച്ച് അനുഷ്‌ക ചുംബിക്കുന്നതാണ് വീഡിയോയിൽ കാണുന്നുണ്ട്. മുൻ കായികമന്ത്രി രാജ്യവർദ്ധ സിങ്ങ് റാത്തോഡ്, ബി.ജെ.പി ഡൽഹി സംസ്ഥാന അധ്യക്ഷൻ മനോജ് തിവാരി, മുന്‍ ക്യാപ്റ്റൻ കപില്‍ ദേവ് എന്നിവരും ചടങ്ങിൽ പങ്കെടുത്തിരുന്നു.

Cute! @AnushkaSharma and @imVkohli caught in an adorable moment during an event in Delhi. pic.twitter.com/C3siyPkWFH

— Filmfare (@filmfare) September 12, 2019