ലാഹോർ: പ്രധാനമന്ത്രി നരേന്ദ്രമോദിക്കെതിരെ ഭീഷണിയുമായി പാക് പോപ് ഗായിക രംഗത്തെത്തി. സോഷ്യൽ മീഡിയയിലൂടെയാണ് താരം പ്രധാനമന്ത്രിക്കെതിരെ ഭീഷണിയുമായെത്തിയത്. പാകിസ്ഥാൻ പോപ് ഗായിക റാബി പീർസാദയുടെ ഉടമസ്ഥതയിലുള്ള ലാഹോറിലെ ബ്യൂട്ടി സലൂണിൽ വച്ച് പെരുമ്പാമ്പുകളുമായുള്ള വീഡിയോയിലാണ് താരം മോദിക്കെതിരെ ഭീഷണി മുഴക്കിയത്. നരേന്ദ്രമോദിക്ക് പെരുമ്പാമ്പുകളെ പ്രത്യേക സമ്മാനമായി അയക്കുമെന്നും നരകത്തിൽ പോയി മരിക്കാൻ തയാറാകൂ എന്നുമാണ് റാബി വീഡിയോയിൽ പറഞ്ഞത്.
‘‘കാശ്മീരി സ്ത്രീയായ ഞാൻ ഈ പാമ്പുകളെ ഇന്ത്യയിലേക്കെത്തിക്കാൻ തയ്യാറായിരിക്കുന്നു. ഈ സമ്മാനം പ്രധാനമന്ത്രി നരേന്ദ്രമോദിക്കാണ്. കാശ്മീരികളെ പരിഗണിക്കുന്ന നിങ്ങൾക്കായാണ് ഇവയെ തയ്യാറാക്കിയിരികുന്നത്. അതുകൊണ്ട് നരകത്തിൽ കിടന്ന് മരിക്കാൻ തയ്യാറായിക്കോളൂ. എന്റെ കൂട്ടുകാർ അവിടെ നിങ്ങളെ ഭക്ഷണമാക്കും’’ -റാബി യൂട്യൂബ് ചാനലിൽ പങ്കുവച്ച വീഡിയോയിൽ പറയുന്നു.
പെരുമ്പാമ്പുകളെയും ചീങ്കണ്ണിയേയും പല വിഭാഗത്തിലുള്ള പാമ്പുകളെയും റാബി മുറിയിൽ നിരത്തിയിരുന്നു. റാബി പീർസാദയുടെ വീഡിയോ സോഷ്യൽ മീഡിയയിൽ പ്രചരിച്ചതോടെ വന്യജീവികളെ സലൂണിൽ സൂക്ഷിച്ചതിന് പഞ്ചാബ് വന്യജീവി സംരക്ഷണ വകുപ്പ് കേസെടുക്കുകയും ചെയ്തു.