ഹൈദരാബാദ്: ലോകത്ത് ഏറ്റവും കൂടിയ പ്രായത്തിൽ അമ്മയായ റെക്കാഡിനുടമ ആന്ധ്രാ സ്വദേശി എറാമാട്ടി മങ്കയമ്മയെ സ്​ട്രോക്ക്​ വന്നതിനെ തുടർന്ന്​ അതീവസുരക്ഷാ വിഭാഗത്തിൽ പ്രവേശിപ്പിച്ചു. സിസേറിയനു​ശേഷം സുഖം പ്രാപിച്ചു വരികയായിരുന്ന മങ്കയമ്മക്ക്​ കഴിഞ്ഞ ദിവസമായിരുന്നു സ്‌ട്രോക്ക് ഉണ്ടായത്. പ്രസവസമയത്തുണ്ടായ രക്തസമ്മർദം കുറയ്ക്കാനായി മങ്കയമ്മയെ നേരത്തെ തന്നെ ഐ.സി.യുവിൽ പ്രവേശിപ്പിച്ചിരുന്നു.

മങ്കയമ്മയുടെ ഭർത്താവ്​ 82കാരനായ സീതാരാമ രാജാറാവുവിനെ കുഞ്ഞുങ്ങൾ പിറന്നതി​ന്റെ അടുത്ത ദിവസം തന്നെ ഹൃദയാഘാതത്തെ തുടർന്ന്​ ഐ.സി.യു.വിൽ പ്രവേശിപ്പിച്ചിരുന്നു. അദ്ദേഹത്തിന്റെ നില മെച്ചപ്പെട്ടുവരികയാണ്​.

സെപ്​തംബർ അഞ്ചിനാണ്​ കോതപേട്ടിലെ അഹല്യ ആശുപത്രിയിൽ 74കാരിയായ മങ്കയമ്മ ഇരട്ട പെൺകുട്ടികൾക്ക് ജന്മം നൽകിയത്​. എറാമാട്ടി മങ്കയമ്മയാണ് വിവാഹം കഴിഞ്ഞ് 57ാം വർഷത്തിൽ കൃത്രിമ ഗർഭധാരണത്തിലൂടെ ഇരട്ടകളെ പ്രസവിച്ചത്. കുഞ്ഞുങ്ങൾക്ക്​ ആരോഗ്യപ്രശ്നങ്ങളില്ലെന്ന് ഡോക്ടർമാർ അറിയിച്ചു. ഇരുവരും രണ്ടു കിലോയിൽ കൂടുതൽ ഭാരമുണ്ട്​.