തിരുവനന്തപുരം: യൂണിവേഴ്‌സിറ്റി കോളേജിലെ വിദ്യാർത്ഥി യൂണിയൻ തിരഞ്ഞെടുപ്പിൽ മത്സരിക്കാൻ കെ.എസ്.യു, എ.ഐ.എസ്.എഫ് സ്ഥാനാർത്ഥികൾ നൽകിയ പത്രികകൾ കൂട്ടത്തോടെ തള്ളി. ചട്ടപ്രകാരമല്ല പത്രികകൾ നൽകിയതെന്നും നാമനിർദ്ദേശ പത്രികയിൽ പിഴവുകളുണ്ടെന്നും ചൂണ്ടിക്കാട്ടിയാണു പത്രികകൾ തള്ളിയത്.
ജനറൽ സീറ്റിൽ അടക്കം എട്ട് സ്ഥാനാർത്ഥികളാണ് പത്രിക നല്‍കിയിരുന്നത്. ഇതിൽ 'ദ പ്രസിഡന്റ്', 'ദ വൈസ് പ്രസിഡന്റ്' എന്നിങ്ങനെ സ്ഥാനപ്പേരുകൾസൂചിപ്പിച്ചില്ലെന്ന കാരണം ചൂണ്ടിക്കാട്ടിയാണ് പത്രിക തള്ളിയതെന്ന് കെ.എസ്.യു പറഞ്ഞു. 20 വർഷങ്ങൾക്കു ശേഷമാണ് കെ.എസ്.യു യൂണിവേഴ്‌സിറ്റി കോളേജിൽ മത്സരിക്കാനൊരുങ്ങിയത്. പത്രിക തള്ളിയതിനെതിരെ കോടതിയെ സമീപിക്കുമെന്ന് കെ.എസ്.യു അറിയിച്ചു.
കാമ്പസിൽ നടന്ന സംഘർഷത്തിൽ സഹപ്രവർത്തകനെ എസ്.എഫ്.ഐക്കാർ തന്നെ കുത്തി പരിക്കേൽപ്പിച്ച സംഭവത്തിന് പിന്നാലെയാണ് കെ.എസ്.യു യൂണിവേഴ്‌സിറ്റി കോളേജിൽ യൂണിറ്റുകൾ തുടങ്ങിയത്.