ബാലുശേരി (കോഴിക്കോട്): ഹരിദാസന്റെ 'ഹൃദയ രഹസ്യം' ഒരദ്ഭുതമാണ്. ഒൻപത് ലക്ഷം പേരിൽ ഒരാൾക്ക് മാത്രം സംഭവിക്കുന്ന അദ്ഭുതം ! സാധാരണ മനുഷ്യരുടെ ഹൃദയത്തിന്റെ ചരിവ് നെഞ്ചിന്റെ ഇടത് ഭാഗത്തേക്കാണ്. ഹരിദാസന്റെ ഹൃദയം വലത്തോട്ട് ചരിഞ്ഞാണ്. 'ഡെക്സ്ട്രോ കാർഡിയ' എന്നാണ് വൈദ്യ ശാസ്‌ത്രത്തിൽ ഇതിന് പറയുന്നത്.

ഇയ്യാട് തെക്കേടത്ത് 'ദേവാമൃത'ത്തിൽ ഹരിദാസൻ വലതുനെഞ്ചിൽ കൈവച്ചു തമാശയായി പറയും: എന്റെ ഹൃദയം ജന്മനാ വലതുപക്ഷമാണ്...ഇപ്പോൾ 60 വയസായി. അദ്ധ്വാനിയായ കർഷകനാണ്. സ്ഥാനം മാറി ഇരിക്കുന്ന ഹൃദയം ഇതുവരെ പ്രശ്നങ്ങളൊന്നും ഉണ്ടാക്കിയിട്ടില്ല.

പതിനഞ്ച് വർഷം മുമ്പ് മാത്രമാണ് ഹരിദാസൻ ഹൃദയത്തിന്റെ ഈ സ്ഥാനം മാറ്റം അറിഞ്ഞത്. രക്തസമ്മർദ്ദം കൂടി കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചപ്പോൾ. എക്കോ ടെസ്റ്റ് ഉൾപ്പെടെ കഴിഞ്ഞതോടെ ഡോക്ടർമാർ ഉറപ്പിച്ചു, ഈ രോഗിയുടെ ഹൃദയം വലതുവശത്തു തന്നെ. രക്തസമ്മർദ്ദം സുഖപ്പെട്ടിട്ടും ഒരാഴ്ചയോളം അശുപത്രിയിൽ കിടത്തി. അത് മെഡിക്കൽ വിദ്യാർത്ഥികൾക്ക് പഠിക്കാനായിരുന്നു - ഹരിദാസൻ ചിരിയോടെ പറയുന്നു. കോഴിക്കോട് മെഡിക്കൽ കോളേജ് അദ്ധ്യാപകൻ ഡോ. ഹരീഷ് കുമാർ താമരശ്ശേരി അക്കാര്യം സാക്ഷ്യപ്പെടുത്തുന്നു.

മുപ്പത് വർഷം മുമ്പ് പനി ബാധിച്ച് നാട്ടിലെ ഡോ. കെ.കെ. മുഹമ്മദ് കുട്ടിയെ കാണിച്ചപ്പോൾ ഇ.സി.ജിയിൽ ചെറിയ പ്രശ്നം സൂചിപ്പിച്ചിരുന്നു. നെഞ്ചിൽ കുഴൽ വച്ച് ഡോക്ടർ പലവട്ടം നോക്കിയപ്പോൾ ഹരിദാസൻ തമാശയായി ചോദിച്ചിരുന്നു: സാറെ എനിക്ക് അവിടെ ഹൃദയമില്ലേ? ഡോക്ടർക്ക് സംശയം തോന്നിയതിനാലാവണം, വിദഗ്ദ്ധ പരിശോധനയ്ക്കായി മെഡിക്കൽ കോളജ് ആശുപത്രിയിൽ പോകാൻ പറഞ്ഞിരുന്നു. പനി ഭേദമായതോടെ അവിടേക്കൊന്നും പോയില്ല. ഡോ. മുഹമ്മദ് കുട്ടി ഉപരിപഠനത്തിനു വിദേശത്തേക്ക് പോയതിനാൽ അദ്ദേഹത്തിന്റെ അന്വേഷണവുമുണ്ടായില്ല.

അടുത്ത കാലം വരെ ബന്ധുക്കൾക്ക് മാത്രമേ ഹരിദാസന്റെ 'ഹൃദയ രഹസ്യം' അറിയാമായിരുന്നുള്ളൂ. ഈയിടെ ഒരു സുഹൃത്തിനോട് പറഞ്ഞു. അതോടെ അങ്ങാടിപ്പാട്ടായി.

ശ്യാമളയാണ് ഹരിദാസന്റെ ഭാര്യ. ഹൃദയേശ്വരിയെന്ന് വിശേഷിപ്പിക്കുന്ന ഭാര്യയെ ഭർത്താവിന്റെ വാമഭാഗം എന്ന് പറയുന്നത് ഹൃദയം ഇടതു വശത്തായതിനാലായിരിക്കണം. ഹരിദാസന്റെ ഹൃദയം വലതുവശത്താണെങ്കിലും ശ്യാമള ഹരിദാസന്റെ പക്ഷത്തു തന്നെ...

ഡെക്സ്ട്രോ കാർഡിയ

ഗർഭാവസ്ഥയിൽ കുഞ്ഞിന്റെ ഹൃദയം വലതുവശത്തായിരിക്കും. കുഞ്ഞ് പൂർണ വളർച്ചയെത്തുന്നതോടെ ഇടതുവശത്തേക്ക് മാറും. ഹരിദാസന്റെ കാര്യത്തിൽ അത് നടന്നില്ല. വൈദ്യശാസ്ത്രത്തിൽ ഡെക്സ്ട്രോകാർഡിയ എന്ന അപൂർവ പ്രതിഭാസമാണിത്.

ഹൃദയം അല്പം സ്ഥാനം മാറി വലതുവശത്തേക്ക് ചാഞ്ഞുനിൽക്കുന്ന അവസ്ഥയുമുണ്ട്. അത് 12,019 പേരിൽ ഒരാൾക്ക് മാത്രം സംഭവിക്കുന്നതാണ്.