വയനാട് : വാഹനപരിശോധനയ്ക്കിടെ കെ.എസ്.ആർ.ടി.സി ബസിലെ യാത്രക്കാരനിൽ നിന്നും പിടികൂടിയത് ഇരുപത് ലക്ഷത്തിന്റെ മയക്കുമരുന്ന്. 2.025 കിലോഗ്രാം ചരസാണ് കടത്തിയത്. കോഴിക്കോട് ചെറൂപ്പ താത്തംചേരി ടി. തെഹ്സിൽ (27) ആണ് മയക്കുമരുന്നുമായി മുത്തങ്ങ ചെക്‌പോസ്റ്റിൽ എക്‌സൈസ് സംഘത്തിന്റെ പിടിയിലായത്. മൈസൂരുവിൽനിന്ന് പൊന്നാനിയിലേക്ക് വരികയായിരുന്ന കെ.എസ്.ആർ.ടി.സി. ബസിലായിരുന്നു ഇയാൾ ചരസ് കടത്തിയത്. ചോക്ലേറ്റിന്റെ രൂപത്തിൽ പായ്ക്ക് ചെയ്ത രീതിയിലായിരുന്നു മയക്കുമരുന്ന്. അന്താരാഷ്ട്ര വിപണിയിൽ 20 ലക്ഷത്തോളം രൂപ വിലമതിക്കുന്ന ലഹരിവസ്തുവാണിതെന്ന് എക്‌സൈസ് സംഘം അറിയിച്ചു. എൻ.ഡി.പി.എസ്. നിയമപ്രകാരം പത്തുമുതൽ 20 വർഷംവരെ ശിക്ഷ ലഭിക്കാവുന്ന കുറ്റമാണിത്.

ബംഗളൂരുവിൽ നിന്ന് വാങ്ങിയ ചരസ് കോഴിക്കോട്ടെത്തിച്ച് ഖത്തറിലേക്ക് കടത്തുകയായിരുന്നു പ്രതിയുടെ ലക്ഷ്യം. മയക്കുമരുന്ന് മാഫിയയിലെ കണ്ണിയാണ് പിടിയിലായതെന്നും മറ്റംഗങ്ങളെ കണ്ടെത്താനുള്ള അന്വേഷണം ആരംഭിച്ചുവെന്നും എക്‌സൈസ് ഉദ്യോഗസ്ഥർ അറിയിച്ചു. എക്‌സൈസ് ഇൻസ്‌പെക്ടർമാരായ ജിജി ഐപ്പ് മാത്യു, പി. സജു, പ്രിവന്റീവ് ഓഫീസർമാരായ കെ. ശശി, കെ.എം. സൈമൺ, സിവിൽ എക്‌സൈസ് ഓഫീസർമാരായ വി. രഘു, അജേഷ് വിജയൻ എന്നിവരടങ്ങിയ സംഘമാണ് ചരസ് പിടികൂടിയത്.