ദുബായ് : അന്താരാഷ്ട്ര വിമാനത്താവള മേഖലയിൽ ഡ്രോൺ സാന്നിദ്ധ്യം ഉണ്ടെന്ന സംശയത്തെതുടർന്ന് രണ്ട് എമിറ്റേസ് വിമാനങ്ങൾ വഴി തിരിച്ചുവിട്ടു. ഡൽഹിയിൽ നിന്നുള്ള EK511, സിംഗപ്പൂരിൽ നിന്നുള്ള EK433 വിമാനങ്ങളാണ് വഴി തിരിച്ചുവിട്ടത്.

ഞായറാഴ്ച ഉച്ചയ്ക്കാണ് സംഭവം. ഉടനടി ദുബായ് അന്താരാഷ്ട്ര വിമാനത്താവളത്തിലെ തന്ത്രപ്രധാനമേഖല അടച്ചിടുകയായിരുന്നു. ആ സമയം ലാൻഡ് ചെയ്യേണ്ടിയിരുന്ന സിംഗപ്പൂർ വിമാനം ദുബായ് വേൾഡ് സെൻട്രൽ വിമാനത്താവളത്തിലും ഡൽഹി വിമാനം ഷാർജ അന്താരാഷ്ട്ര വിമാനത്താവളത്തിലും ഇറക്കി.

യു.എ.ഇ സമയം 12.36 മുതൽ 12.51 വരെയാണ് വിമാനത്താവളം അടച്ചിട്ടതെന്നും വൈകാതെ പ്രവർത്തനങ്ങൾ സാധാരണ നിലയിലായതായും എമിറേറ്റ്സ് വക്താവ് അറിയിച്ചു. പിന്നീട് ഇൗ വിമാനങ്ങൾ ദുബായ് അന്താരാഷ്ട്ര വിമാനത്താവളത്തിൽ തന്നെ തിരിച്ചെത്തിച്ചു. ഏതെങ്കിലും ജീവനക്കാർക്ക് തുടർ യാത്രക്ക് പ്രശ്നമുണ്ടായിട്ടുണ്ടെങ്കിൽ ബുക്കിംഗിനും ബദൽ താമസത്തിനും സൗകര്യങ്ങൾ ഒരുക്കുമെന്നും എമിറേറ്റ്സ് വ്യക്തമാക്കി.