സമീപകാലത്ത് പുറത്തിറങ്ങിയവയിൽ ബോക്സാഫീസ് റെക്കാഡുകൾ തകർത്ത ചിത്രമായിരുന്നു മോഹൻലാൽ നായകനായ ലൂസിഫർ. യുവതാരം പൃഥ്വിരാജ് ആദ്യമായി സംവിധാനം ചെയ്ത ചിത്രകൂടിയായിരുന്നു ലൂസിഫർ. മഞ്ജു വാര്യർ. ടൊവിനോതോമസ്,​ വിവേക് ഒബ്റോയ് തുടങ്ങി വൻതാരനിര അണിനിരന്ന ചിത്രത്തിന് വൻവരവേല്പാണ് ആരാധകർ നൽകിയത്. ചിത്രത്തിന് രണ്ടാംഭാഗമുണ്ടാകുമെന്ന് റിലീസ് തീയതി മുതൽ വാർത്തകൾ ഉണ്ടായിരുന്നു. പിന്നാലെ വാർത്തകൾ സ്ഥിരീകരിച്ച് ചിത്രത്തിന്റെ രണ്ടാംഭാഗം എമ്പുരാൻ എന്ന പേരിൽ പുറത്തിറങ്ങുമെന്ന് അണിയറ പ്രവർത്തകർ അറിയിച്ചു. ചിത്രത്തിന്റെ ഷൂട്ടിംഗ് ഇതുവരെ തുടങ്ങിയിട്ടില്ല. അതിന് മുൻപുതന്നെ ചിത്രത്തിന് മൂന്നാംഭാഗവും ഉണ്ടാകുമെന്ന് സൂചന നൽകുകയാണ് പൃഥ്വിരാജ്

'ആശീർവാദത്തോടെ ലാലേട്ടൻ' എന്ന പരിപാടിയുടെ വേദിയിലാണ് പൃഥിരാജും തിരക്കഥാകൃത്ത് മുരളിഗോപിയും ഇത് മൂന്നാംഭാഗത്തെ സംബന്ധിച്ച് വ്യക്തമാക്കിയത്. പൃഥ്വിരാജ് പറഞ്ഞതിങ്ങനെ: 'ലാലേട്ടന് ഇഷ്ടപ്പെട്ട ഒരു ചിന്ത, ആന്റണി പെരുമ്പാവൂർ എന്ന മലയാളത്തിലെ ഒന്നാം നമ്പർ നിർമ്മാതാവ് പിന്തുണയ്ക്കാൻ തീരുമാനിച്ച ഒരു പ്രോജക്ട്, മുരളിക്ക് ഏത് സംവിധായകനെ വേണമെങ്കിലും ഏൽപ്പിക്കാമായിരുന്നു. അത് എന്നെ വിശ്വസിച്ച് ഏൽപ്പിച്ചിടത്താണ് ഞാനൊരു സംവിധായകനായത്. അതിന് എക്കാലത്തേക്കും എനിക്ക് കടപ്പാടുണ്ട്. പിന്നെ അത് ഔപചാരികമായി പറയാത്തത് അദ്ദേഹം ഒരു സഹോദരനെപ്പോലെയാണ് എന്നതുകൊണ്ടാണ്.

'പിന്നെ, 'രാജൂ, ആരോടും പറയാൻ പാടില്ല' എന്നുംപറഞ്ഞ് മുരളി കാത്തുസൂക്ഷിച്ച രഹസ്യമായിരുന്നു ലൂസിഫർ രണ്ടാംഭാഗത്തിൽ അവസാനിക്കില്ല എന്നുള്ളത്. 'ലൂസിഫറി'ന്റെ മുഴുവൻ കഥ പറയണമെങ്കിൽ മൂന്ന് സിനിമകൾ വേണ്ടിവരുമെന്ന് ആദ്യമേ ഞങ്ങൾക്ക് അറിയാമായിരുന്നു. ആദ്യസിനിമ എടുത്ത്, ചളമാക്കിയാൽ പിന്നെ അത് പറയേണ്ട കാര്യമില്ലല്ലോ എന്ന് കരുതിയാണ് അത് ആദ്യമേ പറയാതിരുന്നത്' പൃഥ്വി പറഞ്ഞു.

ലൂസിഫറിന്റെ രണ്ടാം ഭാഗത്തെക്കുറിച്ചുള്ള ചോദ്യത്തിന് മുൻപൊരിക്കൽ മുരളി ഗോപി നൽകിയ മറുപടിയും വിരൽ ചൂണ്ടുന്നത് ലൂസിഫർ മൂന്നാംഭാഗത്തിന്റെ സാദ്ധ്യതകളിലേക്കാണ്. 'ലൂസിഫർ എന്നത് ഒരു ഫ്രാഞ്ചൈസിന്റെ (ഏടുകൾ) സ്റ്റൈലിൽ ഡിസൈൻ ചെയ്തിട്ടുള്ള സാധനമാണ്. അതിനെക്കുറിച്ചുള്ള ബോദ്ധ്യത്തിൽ തന്നെയാണ് ഞാനും പൃഥ്വിയും ലൂസിഫർ ചെയ്തിരിക്കുന്നത്.'

2020 അവസാനത്തോടെ എമ്പുരാന്റെ ചിത്രീകരണം ആരംഭിക്കും. മോഹൻലാൽ ആദ്യമായി സംവിധാനം ചെയ്യുന്ന ബറോസ് പൂർത്തിയായ ശേഷമാണ് എമ്പുരാനിലേക്ക് കടക്കുക.