തിരുവനന്തപുരം: സംസ്ഥാനത്തെ ഐ.എ.എസ്, ഐ.പി.എസ് ഉദ്യോഗസ്ഥർക്ക് മാറ്റം. ആംഡ് പൊലീസ് ബറ്റാലിയൻ എ.ഡി.ജി.പി ടോമിൻ ജെ.തച്ചങ്കരിയെ ക്രൈം എ.ഡി.ജി.പിയായി നിയമിച്ചു. രണ്ടു ചുമതലയും അദ്ദേഹം വഹിക്കും. നക്സൽ വിരുദ്ധ സേനയുടെ ചുമതലയുള്ള ചൈത്ര തെരേസ ജോണിന് ഇന്ത്യ റിസർവ് ബറ്റാലിയൻ കമൻഡാന്റിന്റെ അധിക ചുമതല നൽകി. ഐ.ടി ആൻഡ് ടെക്‌നോളജി എസ്.പി ഡോ. ദിവ്യ വി.ഗോപിനാഥിന് വനിതാ ബറ്റാലിയൻ കമൻഡാന്റിന്റെ അധിക ചുമതല നൽകി
കൊച്ചി മെട്രോ മാനേജിംഗ് ഡയറക്ടർ സ്ഥാനത്ത് നിന്ന് എ.പി.എം മുഹമ്മദ് ഹനീഷിനെ മാറ്റി. തൊഴിൽ നൈപുണ്യം വകുപ്പ് സെക്രട്ടറിയായാണ് പുതിയ നിയമനം. പാലാരിവട്ടം മേൽപാലം അഴിമതിയിൽ മുൻ പൊതുമരാമത്ത് മന്ത്റി ഇബ്രാഹിംകുഞ്ഞിനും ആർ.ബി.ഡി.സി.കെയുടെ ചുമതല വഹിച്ചിരുന്ന മുഹമ്മദ് ഹനീഷിനും പങ്കുണ്ടെന്ന് മുൻ പൊതുമരാമത്ത് സെക്റട്ടറി ടി.ഒ. സൂരജ് വെളിപ്പെടുത്തിയിരുന്നു. ഈ സാഹചര്യത്തിലാണ് മുഹമ്മദ് ഹനീഷിന്റെ സ്ഥാനമാറ്റം എന്നാണ് സൂചന. നികുതി എക്‌സൈസ് സെക്രട്ടറിയുടെ അധിക ചുമതലയും മുഹമ്മദ് ഹനീഷിന് നൽകിയിട്ടുണ്ട്.
അൽകേഷ് കുമാർ ശർമ്മയാണ് കൊച്ചി മെട്രോയുടെ പുതിയ എം.ഡി. ദേവികുളം സബ് കളക്ടർ വി.ആർ. രേണുരാജിനും സ്ഥാനമാറ്റമുണ്ട്. പൊതുഭരണ വകുപ്പിൽ ഡെപ്യൂട്ടി സെക്രട്ടറിയായാണ് രേണു രാജിനെ നിയമിച്ചത്. സ്ഥാനക്കയറ്റത്തെ തുടർന്നാണ് പുതിയ നിയമനം. മന്ത്റിസഭാ യോഗത്തിലായിരുന്നു തീരുമാനം.