കോട്ടയം: പാലാ ഉപതിരഞ്ഞെടുപ്പിലെ വോട്ടെണ്ണൽ പുരോഗമിക്കവെ ജോസ്.കെ മാണി വിഭാഗത്തിന്റെ വോട്ട് എൽ.ഡി.എഫിന് മറിഞ്ഞെന്ന ആരോപണവുമായി കേരള കോൺഗ്രസ് മുതിർന്ന നേതാവ് പി.ജെ ജോസഫ് രംഗത്തെത്തി. ജോസ്.കെ.മാണി വിഭാഗത്തിന്റെ വോട്ട് എൽ.ഡി.എഫിന് പോയിട്ടുണ്ടെന്ന് അദ്ദേഹം പറ‌ഞ്ഞു. വോട്ടെണ്ണലിന്റെ ആദ്യ ഘട്ടം മുതൽ വ്യക്തമായ ലീഡോടെ മുന്നേറുകയാണ് എൽ.ഡി.എഫ് സ്ഥാനാർത്ഥി മാണി സി.കാപ്പൻ.

അതേസമയം, എൻ.ഡി.എ വോട്ടുകൾ എൽ.ഡി.എഫ് മറിച്ചെന്ന ആരോപണവുമായി യു.ഡി.എഫ് സ്ഥാനാർത്ഥി ജോസ് ടോം രംഗത്തെത്തി. അപ്രതീക്ഷിതമായ തിരിച്ചടിയാ​ണ് യു.ഡി.എഫിന് ഉണ്ടായിരിക്കുന്നതെന്നും ജോസ് ടോം പ്രതികരിച്ചു. എന്നാൽ, എൻ.ഡി.എ വോട്ടുകൾ മറിഞ്ഞിട്ടില്ലെന്നും അങ്ങനെ ആർക്കെങ്കിലും മറിയ്ക്കാൻ സാധിക്കുന്ന വോട്ടല്ല ബി.ജെ.പിയുടേതെന്നും എൻ.ഡി.എ സ്ഥാനാർത്ഥി എൻ.ഹരി പറഞ്ഞു. ബി.ജെ.പി-എൽ.ഡി.എഫ് ധാരണയാണ് പാലാ ഉപതിരഞ്ഞെടുപ്പിൽ പ്രതിഫലിക്കുന്നത് എന്ന ആരോപണവുമായി മുസ്ലീം ലീഗും രംഗത്തെത്തി.

ആറാം റൗണ്ട് വോട്ടെണ്ണൽ പുരോഗമിക്കുമ്പോൾ എൽ.ഡി.എഫ് മുന്നേറ്റം തുടരുകയാണ്. മാണി സി.കാപ്പൻ 4106 വോട്ടുകൾക്ക് മുന്നിലാണ്. എൽ.ഡി.എഫ്- 26384,​ യു.ഡി.എഫ് 22278, , ബി.ജെ.പി- 8258 എന്നിങ്ങനെയാണ് വോട്ടു നില. രാമപുരം,കടനാട്,​ മേലുകാവ്,​ മൂന്നിലവ്,​ തലനാട്,​ തലപ്പലം,​ ഭരണങ്ങാനം എന്നീ പഞ്ചായത്തുകളിലെ വോട്ടുകളാണ് എണ്ണിയത്.