പ​ത്ത​നാ​പു​രം: രോ​ഗം ത​ളർ​ത്തി​യ വ​യോ​ധി​ക​ന് തു​ണ​യാ​യി പത്തനാപുരം ഗാ​ന്ധി​ഭ​വൻ. പെ​രു​മ്പു​ഴ ന​ല്ലി​ല പാ​ല​വി​ള കി​ഴ​ക്കേ​തിൽ ഡി. ബാ​ബു​വി​നെ​യാ​ണ് ഗാ​ന്ധി​ഭ​വൻ ഏ​റ്റെ​ടു​ത്ത​ത്. കൂലിവേലക്കാരനായ ബാബു വിവാഹതിനാണെങ്കിലും ഭാര്യയോടും മക്കളോടും അകന്ന് മാതാപിതാക്കൾക്കൊപ്പമായിരുന്നു താമസിച്ചിരുന്നത്. മാതാപിതാക്കൾ മരിച്ചതോടെയാണ് ഇദ്ദേഹം ഒറ്റയ്ക്കായി.

ഒ​രു ദി​വ​സം ജോ​ലി​ക്കു പോ​കാ​നി​റ​ങ്ങി​യ ബാ​ബു​വി​നെ ആ​യൂ​രിൽ വ​ച്ച് ഇ​രു​ച​ക്ര വാ​ഹ​നം ഇ​ടി​ച്ചു തെ​റി​പ്പി​ച്ചു. ഗുരുതരമായി പരിക്കേറ്റ ഇദ്ദേഹത്തെ നാട്ടുകാരാണ് തി​രു​വ​ന​ന്ത​പു​രം മെ​ഡി​ക്കൽ കോ​ള​ജ് ആ​ശു​പ​ത്രി​യിൽ എ​ത്തി​ച്ചത്. ഇ​ട​തുകാ​ലി​നേ​റ്റ ക്ഷ​ത​ത്തി​നു​ ക​മ്പി​യി​ട്ട​തോ​ടെ പരസഹായമില്ലാതെ നടക്കാൻ കഴിയാത്ത അവസ്ഥയായി, ആശുപത്രിയിൽ നിന്ന് ഡിസ്ചാർജ്ജ് ചെയ്തെങ്കിലും പോകാനിടമില്ലാത്ത ബാബുവിന്റെ അവസ്ഥ ഒരു നഴ്സാണ് ഇയാളുടെ അകന്ന ബന്ധുവിനെ അറിയിച്ചത്. ബന്ധു ഈ വിവരം കു​ള​പ്പാ​ടം പ​ഞ്ചാ​യ​ത്തു പ്ര​സി​ഡ​ന്റി​നെ​യും പൊ​ലീ​സ് സ്റ്റേ​ഷ​നി​ലും അ​റി​യി​ച്ചു. പഞ്ചായത്ത് പ്ര​സി​ഡ​ന്റ് ഗാ​ന്ധി​ഭ​വൻ സെ​ക്ര​ട്ട​റി​ ഡോ. പു​ന​ലൂർ സോ​മ​രാ​ജ​നു​​മാ​യി ബ​ന്ധ​പ്പെ​ട്ടതോടെയാണ് ബാ​ബു​വി​നെ ഗാ​ന്ധി​ഭ​വൻ ഏറ്റെടുത്തത്.