പുനലൂർ: പുനലൂർ റെയിൽവേ സ്റ്റേഷൻ വഴി കടന്ന് പോകുന്ന ട്രെയിനിലെ യാത്രക്കാർക്ക് വ്യത്യസ്തമായ അനുഭവമേകി പുനലൂരിലെ റെയിൽവേ പൊലീസിന്റെ ഓണാഘോഷം. പുനലൂരിലെ റെയിൽവേ പൊലീസ് സ്റ്റേഷനിലെ എസ്.ഐ ഷാജഹാൻ പൊലീസുകാർക്കൊപ്പം മഹാബലിയുടെ വേഷമണിഞ്ഞെത്തി യാത്രക്കാർക്ക് ബോധവത്കരണ സന്ദേശങ്ങൾ നൽകി. ട്രെയിനിൽ യാത്ര ചെയ്യണ്ട രീതി, സുരക്ഷാ ക്രമീകരണങ്ങൾ, മറ്റ് യാത്രക്കാരിൽ നിന്ന് ശല്യമുണ്ടായാൽ ബന്ധപ്പെട്ടവരെ അറിയിക്കേണ്ട രീതി എന്നിവയടക്കമുള്ളവ യാത്രക്കാരോട് വിശദീകരിച്ചു. തുടർന്ന് ഇതുമായി ബന്ധപ്പെട്ട ലഘുലേഖകളും വിതരണം ചെയ്തു.

രാവിലെ അത്തപ്പൂക്കളം ഒരുക്കുകയും ഓണസദ്യ തയ്യാറാക്കുകയും ചെയ്തു. പുനലൂർ ഗവ. താലൂക്ക് ആശുപത്രി സൂപ്രണ്ട് ഡോ. ആർ. ഷാഹിർഷ പരിപാടികൾ ഉദ്ഘാടനം ചെയ്തു. രാഷ്ട്രീയ, സാമൂഹിക, സാംസ്കാരിക നേതാക്കളും ഉദ്യോഗസ്ഥരും സമീപവാസികളും യാത്രക്കാരും ആഘോഷ പരിപാടികളിൽ പങ്കെടുത്തു.