 അംഗീകരിച്ചാൽ ജില്ലയിൽ പഞ്ചായത്തുകൾ 82

കൊല്ലം: ജില്ലയിൽ ജനസംഖ്യയിലും വിസ്‌തൃതിയിലും മുന്നിൽ നിൽക്കുന്നവ വിഭജിച്ച് 14 പുതിയ പഞ്ചായത്തുകൾ രൂപീകരിക്കാൻ ശുപാർശ. നിർദ്ദേശം തദ്ദേശ സ്വയംഭരണ വകുപ്പ് പ്രിൻസിപ്പൽ ഡയറക്‌ടർക്ക് പഞ്ചായത്ത് ഡെപ്യൂട്ടി ഡയറക്‌ടർ കൈമാറി. നിലവിൽ 68 പഞ്ചായത്തുകളുണ്ട്. ശുപാർശ അതേപടി അംഗീകരിച്ചാൽ എണ്ണം 82 ആകും.

പഞ്ചായത്ത് സെക്രട്ടറിമാർ നൽകിയ റിപ്പോർട്ടുകൾ ജില്ലാ തലത്തിൽ വിലയിരുത്തി സ്വീകാര്യമായവയാണ് ശുപാർശയിൽ ഉൾപ്പെടുത്തിയത്. തദ്ദേശ സ്വയംഭരണ വകുപ്പ് പ്രിൻസിപ്പൽ ഡയറക്ടർ, പഞ്ചായത്ത് ഡയറക്ടർ, നഗരകാര്യ വകുപ്പ് ഡയറക്ടർ, ചീഫ് ടൗൺ പ്ലാനർ, കില ഡയറക്ടർ എന്നിവരടങ്ങിയ സമിതിയാണ് പഞ്ചായത്ത് വിഭജനങ്ങളുടെ മാർഗ രേഖ തയ്യാറാക്കി നൽകിയത്. ഇതനുസരിച്ചാണ് പഞ്ചായത്ത് സെക്രട്ടറിമാർ വിഭജനത്തിനുള്ള സാധ്യതാ പഠനം നടത്തി റിപ്പോർട്ട് സമർപ്പിച്ചത്.

 വിഭജിക്കുന്നവ (ബ്രായ്‌ക്കറ്റിൽ പുതിയ പഞ്ചായത്ത്)

1- ചിതറ (മടത്തറ)

2- ഇടമുളയ്‌ക്കൽ (അറയ്ക്കൽ)

3- തൃക്കോവിൽവട്ടം (തഴുത്തല)

4- കല്ലുവാതുക്കൽ (പാരിപ്പള്ളി)

5- വെട്ടിക്കവല (ചക്കുവരയ്‌ക്കൽ)

6- ഏരൂർ (ആയിരനല്ലൂർ )

7- തഴവ (പാവുമ്പ)

8- പന്മന (വടക്കുംതല)

9- ഉമ്മന്നൂർ (വാളകം)

10- പിറവന്തൂർ (പുന്നല)

11- നെടുമ്പന (പള്ളിമൺ)

12- തലവൂർ (പിടവൂർ)

13- ഇട്ടിവ (തുടയന്നൂർ)

14- കുളത്തൂപ്പുഴ (ചോഴിയക്കോട് )

.......................

സംസ്ഥാനത്ത് 40

സംസ്ഥാനത്ത് പുതിയ 40 പഞ്ചായത്തുകൾ രൂപീകരിക്കാൻ സാദ്ധ്യത. അങ്ങനെയെങ്കിൽ കൊല്ലം ജില്ലയിൽ മൂന്നോ നാലോ പഞ്ചായത്തിനേ അനുമതി കിട്ടൂ.

 വിഭജന മാനദണ്ഡം

1- 27430ൽ കൂടുതൽ ജനസംഖ്യ

2- 32 ചതുരശ്ര കി.മീ. കൂടുതൽ വിസ്തീർണ്ണം

3- 50 ലക്ഷത്തിലധികം തനത് വരുമാനം

4- ഭൂമിശാസ്ത്രപരമായ പ്രത്യേകതകൾ

5- മെച്ചപ്പെട്ട സേവനം

6- ഒരു പഞ്ചായത്ത് വിഭജിച്ചാലും രണ്ടിലേറെ പഞ്ചായത്തുകളുടെ ഭാഗങ്ങൾ കൂട്ടിച്ചേർത്ത് പുതിയത് രൂപീകരിച്ചാലും ജനസംഖ്യയിൽ തുല്യത പുലർത്തണം

ടൗൺ പഞ്ചായത്തും

നഗരസഭകളും വേണ്ട

വിഭജിക്കുമ്പോൾ ഒരു ബ്ലോക്ക് പഞ്ചായത്തിന് കീഴിൽ കുറഞ്ഞത് നാല് പഞ്ചായത്ത് വേണമെന്നാണ് മാർഗ്ഗരേഖ. രണ്ടോ മൂന്നോ പഞ്ചായത്തുകളുടെ സംഗമ കേന്ദ്രമായ ടൗണിനെ വിഭജിച്ച് പുതിയ ടൗൺ പഞ്ചായത്ത് വേണ്ട. കാരണം ടൗൺ നഷ്ടമാകുന്ന പഞ്ചായത്തുകൾക്ക് സാമ്പത്തിക ബാദ്ധ്യത ഉണ്ടാകും. നേരത്തേ രൂപീകരിച്ച നഗരസഭകൾ പലതും ഇപ്പോഴും നഗരസ്വഭാവം ആർജിക്കാത്തതിനാൽ പുതിയ നഗരസഭകൾ വേണ്ടെന്നാണ് നിർദ്ദേശം.

.............................

കേരളം നിലവിൽ

കോർപ്പറേഷനുകൾ: 6

മുനിസിപ്പാലിറ്റികൾ : 87

ജില്ലാ പഞ്ചായത്തുകൾ : 14

ബ്ലോക്ക് പഞ്ചായത്തുകൾ : 152

ഗ്രാമപഞ്ചായത്തുകൾ : 941