കൊല്ലം: റിട്ട. അദ്ധ്യാപകനായ കുമ്പളം പേരയം പ്ളാപറമ്പിൽ സഖറിയാസിനെ കൊലപ്പെടുത്തിയ കേസിലെ പ്രതി പേരയം മുളവന ഞാ​റ്റുകപ്പള്ളി വീട്ടിൽ പ്രദീപ് കുമാറിന് ജീവപര്യന്തം തടവ്. ഇതിനൊപ്പം ഒരു ലക്ഷം രൂപ പിഴയും കൊല്ലം അഡിഷണൽ ഡിസ്ട്രിക്ട് ആൻഡ് സെഷൻസ് കോടതി-4 ജഡ്ജി എസ്. കൃഷ്ണകുമാർ ശിക്ഷ വിധിച്ചു.

2011 നവംബർ 19ന് പുലർച്ചെ 1.30നാണ് കുമ്പളം ബസ്‌ സ്‌റ്റാ​ൻഡിൽ പരിക്കേ​റ്റ
നിലയിൽ സഖറിയാസിനെ കണ്ടെത്തിയത്. ആശുപത്രിയിൽ എത്തിച്ചപ്പോഴേക്കും മരിച്ചിരുന്നു. തൊട്ടടുത്ത ദിവസം തന്നെ പ്രതിയെ കുണ്ടറ പൊലീസ് അറസ്​റ്റ് ചെയ്യുകയായിരുന്നു. സാഹചര്യ തെളിവുകളും, ഡി.എൻ.എ ഫലവുമാണ് പ്രോസിക്യൂഷൻ പ്രതിക്കെതിരെ തെളിവായി സമർപ്പിച്ചത്.

സംഭവദിവസം രാത്രി 11.30 മണിയോടെ പ്രതിയെ സഖറിയാസിനൊപ്പം കണ്ടെന്ന സാക്ഷിമൊഴിയും അറസ്​റ്റ് ചെയ്തപ്പോൾ പ്രതി ധരിച്ചിരുന്ന വസ്ത്രത്തിൽ കണ്ട രക്തവും മരിച്ച സഖറിയാസിന്റെ വസ്ത്രത്തിലെ രക്തവും ഒന്നാണെന്ന ഡിഎൻ.എ. പരിശോധനാ ഫലവും കണക്കിലെടുത്താണ് ശിക്ഷ. കുണ്ടറ സി.ഐ ആയിരുന്ന അമ്മിണിക്കുട്ടൻ അന്വേഷിച്ച കേസിൽ കൊല്ലം റൂറൽ ക്രൈം ബ്രാഞ്ച് ഡിവൈ.എസ്.പി അബ്ദുൾറാഷിയാണ് കു​റ്റപത്രം സമർപ്പിച്ചത്.